С.САРУУЛ Шинээр илрээд буй коронавирусийн халдварын талаар Дэлхийн эрүүл мэндийн байгууллага болон Эрүүл мэндийн яамнаас өнөөдөр /2020.01.22/ мэдээлэл өгөв. Сүүлийн мэдээллээр коронавирусийн халдвараар 282 хүн өвчилж, зургаан нь нас бараад байгаа аж. Түүнчлэн Тайландад хоёр, Япон, БНСУ-д  нэг тохиолдол бүртгэгджээ. ЭМЯ-ны Нийгмийн эрүүл мэндийн газрын дарга Д.Нарангэрэл “Чингис хаан нисэх онгоцны буудал дээр Энэтхэг, Хонгконг улсаас ирсэн, халуурсан, амьсгалын замын өвчлөл илэрсэн зургаан хүнийг тусгаарлан лабораторийн шинжилгээ хийгээд шинэ короновирусийн халдваргүйг тогтоосон. Короновирус нь ахуйн хавьтлаар дамжиж байсан бол өчигдрөөс агаар дуслын замаар дамжих эрсдэлтэй болоод байна. Агаар дуслын замаар дамжиж байгаа тул хэн ч өвчлөх эрсдэлтэй. Монгол Улсын хувьд гурав дахь эрсдэлтэй оронд тооцогдож байгаа.. Өчигдрийн байдлаар 14 эмнэлгийн ажилтан уг халдварыг авсан байна. Томуугийн улирал эхэлсэн, урд хөрш болон Монголын Цагаан сарын баяртай холбоотойгоор халдвар тархах өндөр эрсдэл байгаа. “Буянт-Ухаа” дахь нисэх онгоцны буудлаар өдөрт 1000-1200 хүн зорчдог. Үүний 300-400 нь БНХАУ-аас ирдэг гэх мэдээлэл байна. Бидэнд Монголд ирж байгаа зорчигчдын эрүүл мэндийн талаарх мэдээлэл ирдэг. Энэ мэдээлэлд үндэслэн амьсгалын замын шинж тэмдэгтэй хүнийг нь тусгаарлаж, холбогдох арга хэмжээг авдаг” гэсэн юм. Түүнчлэн дэлхий дахинд  өмнө нь коронавирусийн зургаан төрөл бүртгэгдээд байсан бөгөөд энэ удаад долоо дахь нь шинээр илрээд байгаа нь энэ юм. Эх сурвалж: www.polit.mn