Т.САЙХАН УИХ-ын чуулганы нэгдсэн хуралдаанаар /01.10/Эрүүгийн хуульд өөрчлөлт оруулах тухай хуулийн төсөл болон хамт өргөн мэдүүлсэн Зөрчлийн тухай хуульд нэмэлт оруулах тухай хуулийн төсөл хэлэлцэж байна.  Ялангуяа малын хулгайн гэмт хэрэгтэй холбоотой заалтуудыг хэлэлцэж байна. Малын хулгайн гэмт хэрэгтэй холбоотой зохицуулалтыг Эрүүгийн багц хуульд тусгаснаас гадна УИХ-ын гишүүн Х.Болорчулуун, З.Нарантуяа нар тус тусдаа хуулийн төсөл өргөн барьсан. УИХ-ын гишүүн Ж.Мөнхбат: -Мал хулгайн гэмт хэрэгтэй холбоотой хууль маш чухал. Х.Болорчулуун болон З.Нарантуяа нарын гишүүдийн санаачилсан хууль нэгтгэгдээд явж байгаа гэж ойлгож байгаа.  Малчдын зүгээс өнчин ишиг хулгайлсан ч шийтгэдэг болгож өгөөч гэдэг хүсэлтийг тавьсаар ирсэн.   Хоёр бодоос дээш хулгай хийсэн бол хүндрүүлсэн нөхцөлтэй байна гэж хуулийн төсөлд заасан байна. Гэтэл хулгайч нар хоёр биш нэг бод хулгайлаад байвал яах вэ. Энэ хуулиар хоёр бог, нэг бод хулгайлсан хүнд ямар шийтгэл ногдуулах юм бэ. Цөөн мал хулгайлдаг, жижиг хулгай газар авах юм бишүү. Өнчин шиг хулгайлсан ч чанга шийтгэдэг байх зохицуулалт оруулж болохгүй юм уу. УИХ-ын гишүүн Х.Нямбаатар: -Эрүүгийн хуульд бусдын малыг хулгайлсан бол зургаан сараас таван жил хүртэл хорих ялтай болгож байгаа. Мал хулгайлсан хүнд Зөрчлийн хуулиар шийтгэдэг жишиг манайд байхгүй. Эрүүгийн багц хуулийн өөрчлөлтөөр өнчин ишиг хулгайлсан ч зургаан сар хорихоос эхлээд шийтгэл ногдуулна. Малын хулгайн хэрэгт нийтэд тустай хөдөлмөр эрхлэх, зорчих эрхийг хязгаарлах шийтгэл байхгүй.   Мөн хурдан удмын адуу зэрэг өндөр ашиг шимтэй малыг хулгайлсан бол хүндрүүлэх нөхцөлд тооцогдоно. Эх сурвалж:www.polit.mn