Б.ЛХАГВАДУЛАМ Хот хоорондын тээвэр эрхлэгчдийн холбооноос өнөөдөр /01.07/  салбарынхаа тулгамдаж буй асуудлын талаар мэдээлэл хийлээ.  Тус байгууллага нь 10 дахь жилдээ үйл ажиллагаагаа явуулж байгаа бөгөөд тээвэрчид жолоочдын эрх ашгийг хамгаалж ажилладаг байна.   Тус холбооны тэргүүн Т.Хүрэлхүү “Авто тээврийн байгууллагын үйл ажиллагаанд эрх бүхий албан тушаалтан, УИХ-ын гишүүд ард иргэд, зорчигчдын нэрийг барьж хууль бусаар шугам булаан авах, давтамж нэмэх зэрэг үйл ажиллагаа явуулж эхэллээ. Одоогоос дөрвөн жилийн өмнө 40 гаруй байгууллага хот хооронд тээвэрлэлт хийж байсан бол одоо 67 болж нэмэгдсэн.  2011 онд салбарын сайд  тушаал гаргаж, нэг байгууллага багадаа 15-20 тээврийн хэрэгсэлтэй байх ёстой гэж  зааж өгсөн.  Гэтэл өнөөдөр 3-4 тээврийн хэрэгсэлтэй 20 гаруй  байгууллага байна.  Энэ нь  тээврийн бодлого алдагдаж байгаагийн илрэл юм”  гэлээ.   Мөн Увс, Ховд, Баян-Өлгий аймгийн чиглэлд шинэ зам ашиглалтад орж байгаатай холбоотойгоор хувийн ашиг сонирхлоор нэр бүхий албан тушаалтнууд дамтамж нэмэхийг оролдож байгаа гэдгийг хэлж байлаа.  Тиймээс энэ асуудлаар тус холбооноос эхний ээлжинд ЗТХ-ийн сайд Б.Энх-Амгаланд шаардлага хүргүүлж байгаа юм байна. Тус шаардлагад зорчигч урсгал цөөн байгаа үед давтамж нэмнэ гэсэн асуудлаа зогсоох, хэрэв давтамжийг заавал нэмэх шаардлагтай гэж үзвэл Авто тээврийн хуульд заасан нөхөн төлбөрийг нэн даруй шийдэж өгөх зэргийг дурдсан байлаа. Эх сурвалж: www.polit.mn