Т.САЙХАН МАН-ын Удирдах зөвлөл хуралдаж, 2020 оны УИХ-ын сонгуулийг том 26 тойргоор явуулах шийдвэр гаргажээ.  Энэ тухай МАН-ын Ерөнхий нарийн бичгийн дарга Д.Амарбаясгалан тайлбар өглөө.  Тэрээр " УИХ-ын нэр бүхий гишүүдийн зүгээс 50+26 буюу холимог тогтолцоог өргөн барьсан байсан.  Гэтэл энэ хувилбар нь Үндсэн хуультай зөрчилдөж байна.  Тиймээс цэвэр мажоритар тогтолцоогоор сонгууль явуулах нь зөв гэж үзсэн. Хэт жижиг тойргоор сонгууль явуулсны улмаас төсөв тарамддаг. Тойрог бүр дээр оновчтой, оновчгүй хөрөнгө оруулалт  хийгддэг болсон. Цаашдаа сонгуулийн тойргийг аль болох томсгож, массыг хамарсан сонголт хийлгэдэг болох зарчмыг барьж ажиллаж байна. Ингээд Удирдах зөвлөл ярилцаад 2008 онд явж байсан томсгосон мажоритар систем буюу олон мандаттай тогтолцоог дэмжлээ. Бүлгийн гишүүд энэ хувилбар дээр санал нэг байгаа. Энэ хамгийн зөв хувилбар гэж үзэж байгаа” гэв. Удирдах зөвлөлийн хуралд намын дарга У.Хүрэлсүх өөрөө оролцсон бөгөөд намын Удирдах зөвлөлийн шийдвэрийг Удирдах зөвлөлийн гишүүд болон бүлгийн гишүүд дэмжих нь зүйтэй гэсэн саналыг ч хэлсэн байна.  Одоо энэ асуудлыг бүлгийн хуралдаанаар хэлэлцэх юм. Эх сурвалж:www.polit.mn