Японы олон улсын хамтын ажиллагааны байгууллагаас Монгол Улсад хэрэгжүүлж буй “Нийгмийн даатгалын үйл ажиллагааны чадавхийг бэхжүүлэх” төслийн багийнхантай хамтран энэ буланг хөтлөн явуулдаг билээ. Энэ удаа бид Япон улс хөгжлийн бэрхшээлтэй иргэддээ халамжийн үйлчилгээг хэрхэн үзүүлдэг зардлын талаар тайлбарлан хүргэж байна. Халамжийн үйлчилгээ авахад зарчмын хувьд хөгжлийн бэрхшээлтэй иргэн нийт зардлын 10 хувийг төлдөг. Мөн тухайн иргэний өрхийн орлогод үндэслэн сард төлөх дээд хэмжээг дараах байдлаар тогтоосон байдаг. Зардлын 10 хувь нь сард төлөх дээд хэмжээнээс давсан тохиолдолд илүү гарсан зардлыг төлөх шаардлагагүй байдаг. Энэ системийн ачаар олон иргэн халамжийн үнэгүй эсвэл маш бага үнээр үйлчилгээ авдаг. Төрийн халамжийн мөнгөөр амьдардаг айл өрх . . . үнэ төлбөргүй Татвараас чөлөөлөгдсөн айл өрх (жилийн орлого гурван сая иенээс доош) . . үнэ төлбөргүй Жилийн орлого 3-6 сая иений хооронд . . . 9.300 иен Жилийн орлого зургаан сая иенээс дээш . . . 37.200 иен Мөн түүнчлэн Япон улсад хөгжлийн бэрхшээлтэй иргэний төлөх үйлчилгээний хөлсийг хөнгө­лөх тогтолцоо бас байдаг. Эдгээрийг дараах байдлаар ангилсан байдаг. 1. Нэмэлт тэтгэмж: Хөгжлийн бэрхшээлтэй иргэдийн асаргааны төвд амьдарч буй хүмүүст үзүүлэх халамжийн үйлчилгээний зардлаас гадна хоолны мөнгө зэрэг бодит зардлаас хөнгөлдөг. Тодруулбал, хоолны мөнгөө өөрөө гаргах байсан ч гар дээрээ дор хаяж 25 мянган иен үлдэж байхаар нэмэлт тэтгэмж олгодог. Мөн хамтаараа нэг дор амьдарч буй хөгжлийн бэрхшээлтэй иргэдийн байрны түрээсийг хөнгөлдөг (Нэг хүнд сард хамгийн ихдээ 10 мянган иенийн хөнгөлөлт үзүүлдэг). 2. Өндөр өртөгтэй халамжийн үйлчилгээний зардлыг хөнгөлөх тэтгэмж: Нэг өрхөд халамжийн үйлчилгээ авсан хөгжлийн бэрхшээлтэй иргэн хоёроос дээш байгаа тохиолдолд тухайн сард авсан үйлчилгээний зардлын нийт хэмжээ суурь хэмжээнээс (татвараас чөлөөлөгдсөн өрхийн хувьд 37.200 иен) давсан бол илүү гарсан зардлыг олгодог. 3. Халамжийн давхаргад орохоос сэргийлэх нь: Хэрэглэгчээс гарах зардлыг хөнгөлөх бодлого гэж байгаа ч, хэрэглэгчийн төлөх ёстой мөнгийг өөрт нь олгосноор төрөөс халамжийн мөнгө авахад хүрэхээс сэргийлж, төлөх зардлын хэмжээг бууруулдаг. Үүнээс гадна үйлчлүүлэгчийн төлөх нийт зардлын 10 хувийн тухайд шаардлагатай тохиолдолд хөнгөлөх арга хэмжээ авдаг. Монгол Улс цаашид хөгжлийн бэрхшээлтэй иргэдэд чиглэсэн үйлчилгээг илүү сайжруулахдаа үйлчилгээний зардлын талаарх Япон улсын туршлагаас санаа авна гэдэгт итгэлтэй байна. Эх сурвалж: "Зууны мэдээ" сонин