Улаанбаатар хотноо Ази, Номхон далайн бүсийн хөгжлийн бэрхшээлтэй иргэдийг хамт олонд түшиглэн хөгжүүлэх IV конгресс энэ сарын 2-3-нд болно. Хөгжлийн бэрхшээлтэй иргэдийн хөдөлмөр эрхлэлтэд анхаарч буйн илэрхийлэл болох тус үйл ажиллагааны талаар Хөдөлмөр, нийгмийн хамгааллын сайд С.Чинзориг “Төлөөлөгчдийн 40 хувь нь хөгжлийн бэрхшээлтэй иргэд байх юм. Тэд тулгамдсан асуудлаа хэлэлцэж бүс нутгийн хэмжээнд туршлага солилцоно. Бэлтгэл ажил үндсэндээ хангагдаж дууссан. Хөгжлийн бэрхшээлтэй иргэдэд зөвлөн туслах үйлчилгээнүүд, асаргаа, сувиллын үйлчилгээг ахицтай түвшинд бий болгох шаардлагатай. Мөн нийгэм, хамт олонд түшиглэсэн үйлчилгээг бий болгох хууль эрх зүйн орчин бүрдсэн ч хөрөнгө дутмаг. Хөгжлийн бэрхшээлтэй иргэд нийгмийн амьдралд тэгш оролцох нөхцөл боломжийг нь бүрдүүлэхэд дэд бүтэц, гэрлэн дохио, гарц зэрэг үйлчилгээний байгууллагаар хүндрэлгүй үйлчлүүлэх дэд бүтэцтэй холбоотой асуудлыг шийдэж чадахгүй байгаа” гэлээ. Ази, Номхон далайн бүсийн хөгжлийн бэрхшээлтэй иргэдийг хамт олонд түшиглэн хөгжүүлэх IV конгресст 43 орны төлөөлөгч оролцохоо мэдэгджээ.