С.САРУУЛ Барилга, хот байгуулалтын сайд асан З.Баянсэлэнгэ, М.Болортуяа нарт холбогдох хэргийн шүүх хурал өнөөдөр /2019.11.28/  Чингэлтэй дүүргийн Эрүүгийн хэргийн анхан шатны шүүхэд хаалттай болж өндөрлөв. Сайд асан З.Баянсэлэнгэ шүүх хуралд өмгөөлөгчгүй оролцсон юм. Өмнөх шүүх хурлын үеэр түүний өмгөөлөгч Б.Оюунбилэг шүүгчтэй маргасны улмаас З.Баянсэлэнгэ өмгөөлөгчөөсөө татгалзсан байдаг. Харин өмгөөлөгчөө солих хүсэлтийг сар гаруйн турш шүүхэд гаргаж байгаа ч өнөөг хүртэл хүсэлтийг хүлээж авахгүй цагдан хорьж байсан юм. Тиймээс З.Баянсэлэнгэ энэ удаагийн шүүх хуралд өмгөөлөгчгүй оролцож, эрхээ хамгаалуулах хүсэлт тавьсан ч шүүх бүрэлдэхүүн гомдол хүлээж авахгүй хэмээн шийдвэрлэж үргэлжлүүлэн хорихоор болсон байна. Мөн Төрийн банк болон Хятадын хөрөнгө оруулалттай холбоотой ”Шинжиан Шинфа” компанийн хэргийг тусгаарлаж Чингэлтэй дүүргийн Эрүүгийн хэргийн анхан шатны шүүхэд үргэлжлүүлэн хянахаар болов. Харин З.Баянсэлэнгийг “Түрээсний орон сууц”-тай холбоотой гэх хэрэгт шалгахаар Сонгинохайрхан дүүргийн шүүхэд шилжүүллээ. Энэ талаар өмгөөлөгч Л.Мөнхсайхан “Энэ удаагийн шүүх хуралд З.Баянсэлэнгэ нь өмгөөлөгчгүй оролцсон, хоригдож байх хугацаандаа шүүх хуралд өмгөөлөгчтэй оролцох хүсэлтээ удаа дараа өгсөн боловч хүсэлтийг хангаж шийдвэрлээгүй, хариу өгөөгүй. Монголын хууль хяналтын байгууллага хүний эрх зөрчиж байна. Өнгөрсөн хугацаанд З.Баянсэлэнгийн гаргасан хүсэлттэй Ерөнхий шүүгч нэг ч удаа танилцаагүй. Тиймээс З.Баянсэлэнгийг өмгөөлөх, шүүгчидтэй холбоотой асуудлаар Үндсэн хуулийн цэцэд хандана” гэлээ. Эх сурвалж: www.polit.mn