Т.САЙХАН Ерөнхийлөгчийн Тамгын газрын дарга З.Энхболд өнөөдөр /11.01/ Ашигт малтмалын хуулийн зарим заалтыг  Цэцээс хүчингүй болгосон асуудлаар тайлбар өглөө. Тэрээр "УИХ туйлын хариуцлагагүй ажилласан. Сангийн сайд гэж байнга  худлаа ярьдаг нөхөр байна.  1.3 их наяд төгрөг ордог гэдэг нь худлаа. 700 гаруй тэрбум төгрөгийн татвар орсон байна. Ашигт малтмалыг Хятадын нутаг руу гаргавал татваргүй, Монголын нутагт бол таван хувийн татвар тавьсан. Хятадын импортлогчдын даалгавраар УИХ хууль баталсан. Тэрний эзэн нь Сангийн сайд Ч.Хүрэлбаатар. Үүний уршгаар Монголын 100 үйлдвэр хаалгаа барьсан. Уг нь МАН-ын мөрийн хөтөлбөрт 21 аймагт үйлдвэр барихаар тусгасан. Одоо тэрийгээ орлуулах татвараа УИХ яаралтай батлах хэрэгтэй. Ямар ч боловсруулалт хийхгүй улсын хилээр шууд гарч байгаа бол өндөр татвар, Монголдоо боловсруулалт хийж байгаа бол бага татвартай байх ёстой" гэсэн юм.  Тэгвэл зарим эх сурвалж  ЕТГ-ын дарга З.Энхболдыг өөрийн хамаарал бүхий "Страто” компанийг нөөцийн төлбөрөөс  зугтаалгаж, Үндсэн хуулийн цэцээс ийм шийдвэр гаргах лоббиг хийсэн гэж үзэж буй билээ. Эх сурвалж:www.polit.mn