Б.ЖАВХАА 2022 оны ДАШТ, 2023 оны Азийн АШТ-ий урьдчилсан шатны "F" хэсэгт ѳрсѳлдѳж буй Монголын шигшээ баг дѳрѳв дэх тоглолтоо өнөөдөр 16:00 цагаас Киргизийн эсрэг хийхэд бэлэн болоод байна. Манай шигшээ багийн хувьд одоогоор хэсгийнхээ дөрөвдүгээр байрт бичигдэж байгаа. Хэрэв өнөөдөр Киргизээс эерэг үр дүн авч, 11-р сарын 19-нд Мьянмарын талбайгаас оноо салгаж чадвал 2023 оны Азийн АШТ-ий өмнөх "Плэй офф"-ийн шатанд өрсөлдөх шаардлагагүй болно. Киргизийн шигшээ багийн ахлах дасгалжуулагч Александр Крестинин " Бидний гол зорилго хожил авах. Олон гоолын зөрүүгээр хожих үгүй нь тийм ч чухал биш. Монголын шигшээ баг талбайдаа тун хүчтэй өрсөлдөөн үзүүлдэг санагдсан. Тиймээс бид байж болох хамгийн хүчтэй бүрэлдэхүүнээ гаргана." хэмээн ярьсан байдаг.  Тэгвэл Монголын шигшээ багийн ахлах дасгалжуулагч Майкл Вайсс "Японтой тоглосноос өөр тоглолт үзүүлнэ. Японтой тоглоход ур чадварын зөрүү гарсан ч энэ удаад үгүй. 2017 онд Киргизийн багт 3:0-ээр хожигдоход 23-аас доош насны залуус тухайн тоглолтод оролцсон гэдгийг санах хэрэгтэй. Энэ бол үндэсний шигшээ баг. Өнөөдөр үндэсний шигшээ баг өнгөрсөн 2.5 жилд юу сурснаа Киргизийн багт үзүүлнэ. Бөмбөг эзэмшиж, жигүүрээ сольж, хүчтэй өрсөлдөөн үзүүлнэ" гэсэн юм. Манай шигшээ багийн хувьд хэд хэдэн давуу тал байгаагийн эхнийх нь ѳѳрсдийн талбай, үнэнч хѳгжѳѳн дэмжигчид.Мөн хуудасны улмаас Японтой хийсэн тоглолтыг ѳнжсѳн С.Ганхуяг энэ тоглолтод оролцох боломжтой. Дөрөвдүгээр байртаа өндөрлүүлбэл "Плэй Офф" тоглолт хийж Азийн АШТ-ий урьдчилсан шатны гуравдугаар шатанд орох эсэхээ шийдэх юм. Дан ганц ДАШТ бус Ази тивийн хамгийн нэр хүндтэй тэмцээний урьдчилсан шатанд өрсөлдөж буй Монголын шигшээ багийн залуус тоглолт бүрээс эерэг үр дүнтэй гарч ирэхийн төлөө хичээж, эх орныхоо төлөө зүтгэж яваа билээ. Эх сурвалж: www.polit.mn