Т.САЙХАН УИХ-ын чуулганы нэгдсэн хуралдаанаар өнөөдөр /10.04/ ЗХЖШ-ын даргаар Д.Ганзоригийг  томилох асуудлыг хэлэлцсэн.  Энэ  үеэр сүүлийн үед мөрдэстнүүд цэргийн нэртэй ТББ байгуулж, нийгэмд өөрсдийгөө таниулах,  улс төрийн тоглолт хийх зэргээр гарч ирж байгааг зарим гишүүд шүүмжилж байв.  Тухайлбал, УИХ-ын гишүүн О.Баасанхүү "Монгол Улс нэгдмэл тусгаар тогтносон бүрэн эрхт улс. Хамгийн их улстөржилтөөс хол байх ёстой цэргийн мөрдэстэй хүмүүс.  Цэргийн нэгдсэн холбооны гишүүнээр нэгдэх эрх байдаг юм уу” гэхэд ЕТГ-ын дарга З.Энхболд "Ерөнхийлөгч ямар нэгэн эвсэл, холбоонд байхгүй. Үндсэн хуульд заасан эвлэлдэн нэгдэх эрхийнхээ дагуу ТББ-ыг байгуулах нь нээлттэй. Цэргээс халагдсан хүмүүс ТББ байгуулж болно” гэсэн юм. Харин УИХ-ын гишүүн Ц.Нямдорж "О.Баасанхүүгийн яриад байгаа асуудал ноцтой зүйл шүү. Үүнийг төр анхаарах ёстой. Зэвсэгт хүчин гэдэг бол гадаадын түрэмгийллээс эх орноо хамгаалах ийм чиглэлд ажилладаг хүмүүс. Дотоодын асуудал элдэв улс төр цэргийнхэнд хамаагүй.  Генерал хувцас өмсчихөөд фронт гэдгийг байгуулаад явж байгаа нь ноцтой асуудал шүү. Анхаарах асуудал шүү, нэр дэвшигч ээ. Ямар фронт байгуулж, хэнтэй тэмцэлдэх гээд байна. Генерал цолтой хувцас өмсөөд ингэж явж болох уу. Мөрдэс зүүсэн хүн бүхэнд хамаатай асуудал шүү. Өнөөдөр цагдаагийн генерал байж байгаад маргааш нь фронт байгуулаад явах юм уу. Эрүүл биш үзэгдэл” гэлээ.  УИХ-ын гишүүн А.Ундраа "Иргэдийн эвлэлдэн нэгдэх эрхийг хамгаалах байр суурийг би дэмждэг. Цэрэг, эх оронч үзлийг ард нийтэд суулгахыг мөн дэмжинэ. Гэтэл нөгөө талдаа мөрдэс зүүсэн хүн ТББ-тай нэгдээд "Эх орон дуудахад нэгдэхэд бэлэн байна" гээд явж байх нь зөв юм уу. Та сая иргэдийн эвлэлдэн нэгдэх эрх нь нээлттэй гэж хэлснийг мөрдэс зүүсэн хүн ТББ-тай нэгдэхийг  дэмждэг гэж ойлгох уу. Цэргийн алба хаагчид ТББ байгуулаад аймгуудад салбар зөвлөл байгуулан Засаг даргаар тэргүүлэх нь зүйд нийцэхгүй гэж бодож байна гэсэн юм. Эх сурвалж:www.polit.mn