Б.БАЯРЖАВХЛАН Ардчиллын алтан хараацайнуудын нэг С.Зориг агсны хөшөөнд цэцэг өргөлөө. Энэ үеэр түүнтэй хамт ардчилсан хувьсгалын төлөө зүтгэж явсан түүний нөхөд болон Ардчилсан намын удирдлагууд, УИХ гишүүд ирсэн байв. 21 жилийн өмнөх энэ өдрөөс хойш түүнийг хэрцгийгээр хөнөөсөн хэрэгтнүүдийг хайж, ямар нэгэн таамаг дэвшүүлж, цагдаа хүчний байгууллагаас хариу шаардаж, улстөржиж ирсэн билээ. Энэ үеэр Ардчилсан намын дарга С.Эрдэнэ “Энэ хэргээр 21 жил улс төр хийлээ. Нууц гэдэг асуудлын дор улстөржүүлж, хөшигний ард тоглодгоо болих хэрэгтэй. Хэргийн материалуудыг ард иргэдэд нээлттэй болгох ёстой. С.Зоригийг хөнөөсөн хэргийг үйлдсэн этгээдүүдийг гурван шатны шүүхээр тогтоосон шийдвэр гаргасан. Нэр бүхий улстөрчид улс төр хийж, ашиг хонжоо харсан байдалтай байна. Одоо болтол захиалагч ил болохгүй байна. Ерөнхий сайд, Засгийн газарт Ардчилсан намын даргын хувьд захиалагчийг ард түмэнд зарла гэсэн хүсэлт илгээсэн. Эрүүдэн шүүсэн бичлэг бол кино зураг. Өндөр нягтаршил бүхий камераар бичсэн байсан. Хэзээ ч шоронгийн камер тийм байдаггүй юм. Битгий зохион байгуулалттай улс төрийн жүжиг тавиад бай. Хэргийн захиалагч ил болох гэхээр янз бүрийн тавилттай жүжиг тавьдгаа болимоор байна” гэсэн юм. Мөн С.Зориг агсны ах С.Баяр ирсэн байв. Тэрээр “Энэ аллага үйлдэгдээд 21 жил боллоо. Энэ хугацаанд ар гэрийнхэн бид хэргийг шуурхай шийдвэрлэх талаар хүсэлтээ төр засагт гаргасаар ирсэн. Бид энэ хэргийг захиалагч, зохион байгуулагчид олдохоос нааш санаа амрахгүй. Гомдол тайлагдахгүй. Хэрэг илэрнэ гэж итгэсээр ирсэн. Хэрэг илэрч байж Монголын ард түмний хүндэтгэдэг хүүгийн харамсалтай тавилангийн эцсийн хариуг сонсоно гэж бодож байна” гэсэн юм. Эх сурвалж: Зууны мэдээ сонин    №196 (6163)