Д.ЭНХЭЭ ОХУ болон АНУ-ын ерөнхийлөгч Владимир Путин, Дональд Трамп нарын хооронд болсон ярианы дэлгэрэнгүй тэмдэглэлийг нийтэд ил болгох боломжийн талаар есдүгээр сарын 30-ны даваа гаригт  Кремльд тайлбар хийсэн байна. Оросын лидерийн хэвлэлийн нарийн бичгийн дарга Дмитрий Песков сэтгүүлчдэд тайлбарласнаар энэ бол “зөвхөн талуудын харилцан зөвшөөрлийн дагуу боломжтой”  гэсэн байна. Гэхдээ ингэж нийтэд ил болгох явдал түүний хэлснээр дипломат практикт байдаггүй. "Тийм учраас хэрвээ америкчууд ямар нэг дохио өгвөл бид авч хэлэлцэнэ”хэмээн хэвлэлийн нарийн бичгийн дарга нэмж хэлэв. Украины ерөнхийлөгч Владимир Зеленскийтэй Трампын утсаар ярьсан бичлэгийг АНУ-д нийтэд ил болгох талаар ярихдаа Песков энэ бол Америкийн дотоод асуудал хэмээн онцлов. Орос улс энэ үйл явцад хөндлөнгөөс оролцдоггүй, оролцох эрх ч байхгүй хэмээн Кремлийн төлөөлөгч нэмж өгүүлэв.   Вашингтон дахь дахь дуулиан   Долоодугаар сард Зеленскийтэй ярилцах үеэр Трамп Киевт үзүүлэх тусламжийн хариуд АНУ-ын дэд ерөнхийлөгч асан Жо Байдены хүү Хантер Байдены үйл ажиллагааг мөрдөн шалгах хүсэлт тавьсан тухай мэдээлэл олон нийтийн мэдээллийн хэрэгсэлд өмнө нь гарсан. АНУ-ын ерөнхийлөгчид нэр дэвшүүлэх өрсөлдөөнд том Байден тэргүүлж байгаа бөгөөд сонгуульд Трампын өрсөлдөгч болж мэдэх юм. Трамп, Зеленский нарын яриа ардчилагчдын зүгээс импичмент эхлүүлэх шалтаг болсон. Дараа нь Цагаан ордон ярианы дэлгэрэнгүй бичлэгийг нийтэлсэн. Америкийн ерөнхийлөгч бага Байдены хэргийг мөрдөн шалгах ажлыг сэргээхийг үнэхээр уриалсан боловч ярианы үеэр Трамп энэ тухай хүсэхдээ Киевт үзүүлэх тусламжийн баталгааны хариу болгох тухай зүйл байхгүй ажээ. Тухайн үед том Байден дэд ерөнхийлөгч байж, Киевтэй харилцах асуудлыг эрхэлж байсан бөгөөд түүний хүүг Burisma Holdings хэмээх хийн томоохон хувийн компанийн удирдлагад оруулсан байжээ. 2014 оны хавраас 2015 оны намар хүртэлх банкны баримтаар Хантерын Rosemont Seneca Partners LLC хэмээх америкийн пүүсийн дансанд Burisma-гийн данснаас сар бүр 166 мянган доллар шилжүүлсэн байна. Украины ерөнхий прокурор Виктор Шокин 2016 онд тусгай мөрдлөг явуулж эхэлмэгц түүнийг ажлаас нь халсан байна. Халуулах шийдвэрийн төлөө том Байден зүтгэл гаргасан. Хожим нь тэрээр ийм шийдвэр гаргуулж чадсанаа нийтэд ярьж байжээ. Эх сурвалж: www.polit.mn