Д.НАДМИД Халх голын дайны ялалтын 80 жилийн ойд зориулан “Хоёр ард түмэн- Нэг ялалт” гэрэл зургийн үзэсгэлэнг Монгол Улсын Үндсэний мэдээллийн МОНЦАМЭ агентлаг, ОХУ-ын олон улсын  “Россия Сегодня” агентлагийн “Спутник” радиотой хамтран зохион байгуулав. Үзэсгэлэнд 50 гаруй ховор нандин гэрэл зураг дэлгэсэн бөгөөд МОНЦАМЭ агентлагийн архивт хадгалж буй “Дайсны байлдааны нисэх онгоц сөнөсөн газар дээр”, “Зөвлөлт-Монголын цэрэг тулалдааны өмнө”, “БНМАУ-ын Маршал Х.Чойбалсан Зөвлөлт-Монголын дайчидтай уулзаж байна”, Халх голын байлдаанд олзлогдсон япон цэргүүдийн хувийн эд зүйлс, Монгол Улс, ОХУ-ын зэвсэгт хүчний терроризмын эсрэг “Сэлэнгэ-2015” хамтарсан хээрийн сургууль зэрэг 20 орчим гэрэл зургийг дээжлэн үзүүлсэн юм. Мөн Оросын талаас “Монгол Улсын нутаг дэвсгэрт байрласан Зөвлөлтийн Армийн нэгдүгээр бүлэглэлийн командлагч Георгий Жуков”, “Халх голын тулалдааны үеэр Зөвлөл, Монголын дайчдын командлагч Георгий Жуков”, “Халх голын тулалдааны үеэр Зөвлөлт, Монголын дайчдын олзолсон зэр зэвсгийн үзэсгэлэн”, “Халх голын орчимд Улаан армийн цэргүүдэд олзлогдсон япон цэргүүд”, “Зөвлөлтийн офицерууд олзлогдсон япончуудыг Халх голын байлдааны үеэр байцааж байгаа нь” зэрэг 36 гэрэл зургийг дэлгэжээ. Халх голын тулалдаанд байгуулсан ялалт нь өнөөг хүртэл Орос-Монголын ард түмний найрамдал нөхөрлөл, эв нэгдлийг бэлгэ тэмдэг болсоор байна гэдгийг уг үзэсгэлэн харуулав. Түүхэн үнэн юу юм бэ? гэдгийг энэ үзэсгэлэнгээс харж болох ажээ. Үзэсгэлэнгийн нээлтэд УИХ-ын гишүүн, Гадаад харилцааны сайд Д.Цогтбаатар, Нийслэлийн Засаг дарга бөгөөд УБ хотын захирагч С.Амарсайхан болон ОХУ-аас Монгол улсад суугаа элчин сайдын яамны ажилтнууд зэрэг зочид оролцов. Эх сурвалж: www.polit.mn