Т.САЙХАН Ерөнхийлөгч Х.Баттулга 2019-2020 оны хичээлийн шинэ жилийн нээлтэд зориулан эх орон, тусгаар тогтнол, монгол хэл, соёл зэрэг сэдвээр теле хичээл заалаа. Энэ жилийн хичээлийн нээлт нь Халхын голын байлдааны ялалтын 80 жилийн ойтой давхцаж байгаагаараа онцлог тул  Ерөнхийлөгч Х.Баттулга эх орон гэх ойлголтоос эхэлж, түүх уламжлал, хэл соёлын нэгдмэл байдал нь эх орон гэх багануудын нэг хэмээсэн юм. Мөн эрх чөлөө, тусгаар тогтнолыг урт удаан хадгалахын тулд улс орон хөгжих ёстой, иргэд боловсролтой, эх оронч сэтгэхүй, ёс зүйтэй байх хэрэгтэйг  сануулж, теле хичээлийн турш дээрх сэдвээр ярилцсан юм. Тэрээр 1946 онд Төв талбайн суурийг тавьсан түүхийн талаар сонирхуулахаас гадна дэлхийн хамгийн том морьт хөшөө буюу Чингис хааны Хөшөөт Цогцолбор Цонжин болдогийг танилцуулсан. Түүний дараагаар 150 жилийн ой тохиож байгаа Богд Хааны ордон музейн талаар болон тухайн үеийн тусгаар тогтнол, улсын нийгмийн бүтэц, нийгмийн талаар ярьсан юм. Мөн 1951 онд Төрийн дууллын шүлгийг бичсэн Ц.Дамдинсүрэнгийн хөшөөг танилцуулж, төрийн дуулал, Монголын хэл бичгийн түүхийн талаар хүүхдүүдэд сонирхуулсан юм. 1939 онд Халх голын дайнд чухал үүрэг гүйцэтгэсэн Гарамгай баатар Дандар гуайн хөшөөг танилцуулж энэхүү дайны түүх, 80 жилийн ойн талаар тэдэнд ярьсан юм. Ерөнхийлөгч Х.Баттулга “Эх оронч нэгэн байхын тулд нэн түрүүнд түүхээ мэдэх ёстой. Муу зуршилгүй, муу явахгүй, муу сурахгүй байх хэрэгтэй юм шүү” хэмээлээ. Эх сурвалж:www.polit.mn