Б.БАЯРЖАВХЛАН Хичээлийн шинэ жил эхлэх гэж буйтай холбоотойгоор их, дээд сургуулийн оюутнууд нийтийн тээврийн смарт картыг шинээр олгох болон сунгах асуудлаар нийслэлийн Боловсролын газар, нийслэлийн Хөдөлмөр эрхлэлтийн газар, “Улаанбаатар смарт карт” компаниас  тодрууллаа. Энэ талаар Боловсролын газрын Захиргааны хэлтсийн дарга Г.Мөнхбилэг “2019-2020 оны хичээлийн жилд нийтийн тээврийн хөнгөлөлтийн карт авах оюутнуудын хүсэлтийг сургууль тус бүр дээр энэ сарын 26-30-ны хооронд хүлээн авсан.  Сургуулиуд наймдугаар сарын 30-наас есдүгээр сарын тавны хооронд карт шинээр захиалах болон сунгуулах хүсэлтийг нийслэлийн Боловсролын газарт ирүүлэх ёстой. Есдүгээр сарын зургаанаас эхлэн ажлын 3-10 хоногт багтаан сургуулийн хүүхдүүдийн тооноос хамаарч олголтыг хийж эхэлнэ” гэв. Харин  политехник коллежийн оюутан залууст энэ хичээлийн жилд автобусны хөнгөлөлтийн 14194 оюутанд карт олгохоор төлөвлөсөн байна. Мөн тус картыг “Сонор плаза” төвийн таван давхарт байрлах цагийн ажлын биржээр дамжуулан олгоно. Өмнө нь оюутны смарт картын сунгалтын ажлыг есөөс арванхоёрдугаар сарын хооронд хийдэг байсан бол энэ жил есөөс зургадугаар сар хүртэл хийх ажээ. Оюутнууд автобусны карт болон сургалтын төлбөрөө төлсөн баримттайгаа очиж сунгалт хийлгүүлэх юм байна. Эх сурвалж: www.polit.mn