С.САРУУЛ Монгол залуучууд дрифт сонирхож, гадныхнаас дутахааргүй хөгжүүлэхийг эрмэлздэг болсон нь сайн хэрэг. Гэвч дрифтлэнэ гэдэг жолоочоос маш их туршлага, эр зориг, авхаалж самбаа шаарддаг. Мөн техникийн үзүүлэлтээс эхлээд хүссэн хүн бүр дрифийг хоббигоо болгох боломжгүй юм. Тэгвэл жолоочоос өндөр мэдрэмж, ур чадвар шаарддаг энэ спортыг хоббигоо болгож, зугаагаа гаргах болсон залуус  сүүлдээ хүний амиар “наадаж” эхэллээ. Шөнө оройн цагаар хүмүүсийн амгалан тайван байдал алдагдуулахаас гадна осол хийсэн тохиолдол өмнө нь ч  их гарч байсан. Гэтэл сүүлдээ хүний алтан амиар зугаагаа гаргадаг боллоо. Тухайлбал, өнгөрсөн шөнө Баянзүрх дүүргийн нутаг дэвсгэр Дүнжингаравын зүүн урд замд шөнийн 03: 00 цаг орчим Субару импреза маркийн автомашин онхолдож  хоёр эмэгтэй, нэг эрэгтэй нас барсан ноцтой осол хэрэг гарлаа. Тодруулбал, хэсэг залуус дрифт эргэж байгаад осолдсоноос гурван хүн газар дээрээ нас баржээ. Албаны эх сурвалжийн мэдээлснээр дайруулсан хоёр эмэгтэйн эд эрхтэн нь задарч, хүн танихын эцэсгүй болсон бол жолооч нь машинтайгаа шатсан байна. Тиймээс дриф сонирхох нэрийдлээр дэггүйтэж байгаа залуусыг дэглэх цаг болжээ. Тэгэхгүй бол цаг бусаар олон зуун хүний амь насыг авч одсоор байгаа зам тээврийн осол дээр дахиад дрифчдийн балаг нэмэгдэх нь. Дээрх осолтой холбоотойгоор Тээврийн цагдаагийн албанаас спорт болон нэмэлт тоноглолтой тээврийн хэрэгслээр хотоос зайдуу замд зориулалтын бус зам, талбайд дрифт хийх, тээврийн хэрэгслийн хурд, хүчийг үзэх бусдын амгалан тайван байдлыг алдагдуулж байгаа үйлдэл нь өөрийн болон бусдын амь нас, эрүүл мэндэд эрсдэл учруулж байгааг анхаарууллаа. Эх сурвалж: www.polit.mn