Б.БАЯРЖАВХЛАН Монгол, Туркийн 50 жилийн ойн маркийн гол зураачаар ажилласан Х.Баярмагнайтаa ярилцлаа.   -Яриагаа таны сүүлийн уран бүтээл болох Монгол, Туркийн 50 жилийн маркийн зураачаар ажилласан гэсэн. Энэ талаар яриагаа эхэлье? -Анх удаа маркийн зураачаар ажилласан маань Монгол, Туркийн 50 жилийн ойн марк байлаа. Их билэгшээж байгаа. Маркны эх болон санааг хоёр улсын Их хурлын түвшний ажлын хэсэг хэд хэдэн удаа хуралдаж, Монгол шуудан компани болон миний бие санаагаа шингээсний үндсэн дээр марк бүтсэн. Маркны санаа дүслэл болгон нарийн шүүлтүүрээр гарсан болохоор сайн бүтээл болсон байх гэж бодож байна. -Утга санааны хувьд их гүнзгий санагдсан? -Тиймээ. Хоёр улсын эв найрамдлыг шингээхийг зорьсон. Нэгдүгээрт, Турк улсын Истанбул хотын хоёр тулгууртай Евро-Азийг холбосон Босфорын гүүр дээгүүр нисэж буй Монгол Улсын онгоц, хажуу талд нь Туркийн үндэсний бахархалт Алтанзул цэцэг. Хоёрдугаарт, нэрийн марканд Монгол Улсын нийслэл Улаанбаатар буусан Турк улсын онгоц түүний наана хадаг, мөнгөн аягатай сүү барин хүндэтгэн угтаж буй монгол эмэгтэй байх бөгөөд хажуу талд нь Монгол Улсын үндэсний бахархалт Бэрцэцэгийг байрлуулсан. Хэлхээ маркийн дунд хэсэгт 50 жилийн ойн логог зохиомжилж дүрсэлсэн. Хэлхээний доод хэсгийн чимэглэл зурагт хоёр улсын түүхэн харилцааг тусгаж өгсөн юм. Торгоны замын тэмээн жингийн цувааг дүрсэлж ард хэсэгт нь Турк улсын Истанбул хотод байх ЮНЕСКО-д бүртгэгдсэн түүхэн дурсгалт Софийн цогчин дуган, Анкара хотын Анкара цайз, Ил хаант улсын шадар сайд Чобан ноёны бариулсан Арас мөрөн дээрх Чобандеде гүүр, Көседаг уул мөн Орхоны хөндий, Түрэгийн үед хамаарах Хөшөө цайдамын дурсгал болох Культегины хөшөө, XIII зууны Их Монгол Улсын гэр тэрэг, эртний нийслэл Хархорум хотын төв талбай, Мөнгөн модыг оруулсан. Мөн Турк буюу эртний нүүдэлчин Түргүүд одоогийн Монголын газар нутагт улсаа байгуулж явсан үеийн түүхэн дурсгалын талаар болон Их Монгол Улсын байлдан дагууллын үед одоогийн Туркийн газар нутагт үлдээсэн түүхэн явдлуудыг эргэж нягталж танин мэдэж, уншиж судалсан явдал энэ марк бүтэхэд илүү дөхөм байсан. Харин хоёр улсын онгоцыг дүрсэлсэн нь орчин үед алс холын бөгөөд түүхэн холбоотой улс орнууд цаг хугацааг товчлон агаарын хөлөг ашиглан шууд харьцдаг болсон бодит байдлын илэрхийлэл болгож хоёр улсын онгоцуудыг дүрсэлсэн. Анх удаа маркны зураачаар ажилласан, олон эрдэмтэн судлаачийн буянд хүндрэл бага байсан. -Хэзээнээс уран бүтээл туурвих болов? -2000 оноос эхэлж уран бүтээлээ туурвих болсон. Аав ах хоёр маань зурдаг байсан. Уран зураг хэрхэн бүтэж байгааг, харж өссөн болохоор уран зурагт дурласан байх гэж боддог. -Одоо хаана уран бүтээлээ туурвиж байгаа вэ. Ямар уран бүтээл дээр ажиллаж байна? -Би чөлөөт уран бүтээлч. Одоогоор зуслан дээрээ уран бүтээлээ хийж байна.Намраас л нэг газар орох байх. -Та өөрийн оролцож байсан үзэсгэлэнгүүдээсээ сонирхуулахгүй юу? -2001 онд Хүний эрхийн байгууллагаас зохион байгуулсан зургийн үзэсгэлэн, 2014 онд МУЗН-ээс зохион байгуулсан зургийн үзэсгэлэн, 2011 Монголын хэлмэгдэгсдийн холбооноос зохион байгуулсан зургийн үзэсгэлэн 2012, 2013 онд Уран зургийн галерейгаас зохион байгуулсан шилдэг зургийн үзэсгэлэн, 2014 БОАЖЯ-наас зохион байгуулсан палеонтологийн сэдэвт зургийн үзэсгэлэнд оролцож байсан. Бие даасан үзэсгэлэн гэвэл 2017 онд “Монголын үнэртэй салхи” 2018 онд “Уяхан замбуутивийн наран”  нэртэйгээр гаргаж байсан. -Ойрд өнгийн харандааны ид шидийг мэдэрч бас мэдрүүлж таниулах хүслээр харандаан зураг туурвиж байна. 3 дах үзэсгэлэнгээ өнгийн харандаан ажлуудаараа гаргах төлөвлөгөөтэй. Хүүхдийн хичээлийн хэрэгсэл төдийгөөр хязгаарлагддаг энэ харандаагаар урлагийн бүтээл туурвиж болохыг батлах зорилготой юм. Зурах дуртай хүүхэд залуустаа хүний авъяас 1% харин хөдөлмөр 99% гэдэг үгийг байнга санаж, өдөр бүр, цаг бүр зурах ур чадвараа хөгжүүлж, өөрийн авъяас чадвараа тордож яваарай гэе. Эх сурвалж www.polit.mn