Б.БАЯРЖАВХЛАН Тээврийн цагдаагийн албанаас ирүүлсэн мэдээгээр ТЦА-ны жижүүрийн шуурхай удирдлагын хэлтэст өнгөрсөн даваагаас пүрэв гаригийн хооронд (07.29-08.01) нийт 965 дуудлага ирсэн байна. Үүнээс зам тээврийн ослын шинжтэй 637 дуудлага, мэдээллийг хүлээн авч, шалгалтын ажиллагаа явуулжээ. Бүртгэдсэн осол хэргийн улмаас нийслэлд 22 хүн гэмтсэн бол ноцтой зам тээврийн ослын улмаас нийслэлд  хоёр, орон нутагт нэг хүн амь насаа алджээ. Мөн зам тээврийн ослын улмаас 6 хүүхэд бэртэж гэмтсэн бөгөөд тав нь явган зорчигч, нэг нь унадаг дугуйтай замын хөдөлгөөнд оролцсон байна. Явган зорчигч хэлбэрээр хөдөлгөөнд оролцож байсан таван хүүхдийн хоёр нь эцэг эхийн хамт гарц, гарамтай газраар замын хөдөлгөөнд оролцож байсан бол гурван хүүхэд нь ганцаараа гарц, гарамгүй газраар зам хөндлөн гарч байхдаа осолд өртсөн байна. Зам тээврийн ослын улмаас гэмтэж бэртсэн хүмүүсийн долоо нь архи согтууруулах ундааны зүйл хэрэглэсэн үедээ замын хөдөлгөөнд оролцжээ.  Үүний гурав нь жолооч, дөрөв нь явган зорчигч байсан байна. Өмнөх 7 хоногийн нөхцөл байдалтай харьцуулахад нийт дуудлага мэдээлэл 23.7 хувиар, зам тээврийн ослын шинжтэй дуудлага 32.7, зам тээврийн ослын улмаас нас барсан  хүний тоо 50 хувиар өссөж,  гэмтсэн хүний тоо 45 хувиар  буурсан үзүүлэлттэй байгаа юм байна. Явган зорчигчтой холбоотой ноцтой зам тээврийн осол, хэрэг нэмэгдэж байгаа  тул иргэд, жолооч та бүхэн замын хөдөлгөөнд оролцохдоо замын хөдөлгөөний дүрмээ биелүүлж, хөдөлгөөнд соёлтой оролцохыг ТЭЭВРИЙН ЦАГДААГИЙН АЛБА-аас уриаллаа. Эх сурвалж: www.polit.mn