Н.ДАЯН ДЭМБ-ын мэдээлснээр дэлхий дээр 325 сая хүн вируст хепатитийн халдвартай амьдарч байна. Үүнээс жил бүр 1.4 сая хүн энэ өвчнөөс үүдэлтэй элэгний хатуурал, хорт хавдрын улмаас нас бардаг. Тиймээс жил бүрийн долдугаар сарын 28-нд “Дэлхийн хепатитийн өдөр”-ийг дэлхий нийтээр зохион байгуулагдаг. Энэ жил энэ өдрийг “Хепатитийг бууруулахад хувь нэмрээ оруулцгаая” уриан дор Эрүүл мэндийн яам, Нийгмийн эрүүл мэндийн үндэсний төв, ДЭМБ, ТББ, хувийн хэвшлийн эрүүл мэндийн байгууллагууд хамтран энэ сарын 26-нд Сүхбаатарын талбайд өдөрлөг зохион байгуулахаар ажиллаж байна. Энэ үеэр элэгний В, С вирусын шинжилгээ, оношилгоо, элэгний хатуурлын зэргийг тогтоох үзлэгийг хийх ажээ. Мөн эрүүл мэндийн даатгалын талаарх мэдээлэл, үйлчилгээг авах боломжтой. Монгол Улсад хепатитийн вирусын шалтгаантай өвчлөлийн улмаас 2017 онд 1614 хүн нас баржээ. Хепатитийн В, С вирусын халдвар нь элэгний хавдрын гол шалтгаан болдог. Элэгний хорт хавдрын 80 хувь нь хожуу шатандаа оношлогддог байна. 2017 онд эхлүүлсэн “Элэг бүтэн Монгол” үндэсний хөтөлбөр нь 2020 он гэхэд Монгол Улсын хүн амын дунд вируст хепатитийн халдварын тархалтыг хязгаарлан, С вируст хепатитийн халдварын шинэ тохиолдлыг 2020 онд таслан зогсоож, вируст хепатитийн үүдэлтэй элэгний архаг үрэвсэл, хатуурал, хорт хавдрын шалтгаант нас баралтыг эрс бууруулах өндөр зорилт тавин ажиллаж байгаа ажээ. Эх сурвалж: www.polit.mn