Ч.ЗОТОЛ Монгол Улс, Бүгд найрамдах Солонгос улсын  хооронд дипломат харилцаа тогтоосны 30 жил,  Сөүл-Улаанбаатар хотууд ах дүүгийн харилцаа тогтоосны 25 жилийн ой 2020 онд болно. Энэ ойг угтан  Сөүл хотын зүгээс “Үндэсний Их баяр наадам”-ын үеэр гэрэлт дроны шоу, Сөүлийн гудамжинд Солонгос-Монголын хамтлаг, дуучдын тоглолт, бүжгийн флаш моб болон хүүхэд залуучуудад зориулсан соёлын олон арга хэмжээнүүдийг зохион байгуулж мэндчилгээ дэвшүүлнэ. Шоу тоглолт үнэ төлбөргүй бөгөөд өндөр шагналтай олон хөтөлбөрүүд зохиогдохоороо онцлог юм. Мөн бүх үзэгчдэд Сөүл хотын бэлгийг  гардуулах аж. Тэд наадмаар залууст зориулсан хөтөлбөр багатай байдаг учраас энэ амралтын өдрүүдэд тэдэнд зориулж энэ бүхнийг зохион байгуулж байгаагаа тэмдэглэсэн. “Drone Lighting Show “Fly 2019” үзүүлбэр энэ сарын 11-нд Сүхбаатарын талбайд 22:00 цагт, I*UB- Seoul*U Song&Dance Festival тоглолт энэ сарын 13-нд Циркийн задгай талбайд 17:00 цагт тус тус  болох юм. . Үүнтэй холбогдуулан Сөүл хотын Иргэдийн төлөөлөгчдийн хурлын Соёл урлаг, спорт, аялал жуулчлалын газрын дарга Ким Чон Воноор ахлуулсан дөрвөн төлөөлөгч, Сөүл хотын брэнд хариуцсан мэргэжилтэн, захиргааны хөтөлбөр хариуцсан мэргэжилтэн, техникийн ажилтан, зураглаач, найруулагч зэрэг нийт 19 хүний бүрэлдэхүүнтэй ажлын алба хүрэлцэн ирж ажиллаж байна. Тэд Сөүл хотын даргын захидал мэндчилгээг Улаанбаатар хотын удирдлагуудад хүргэх бөгөөд цаашдын хамтын ажиллагааны боломжуудын талаар ярилцах юм. Мөн Үндэсний Их баяр Наамдыг үзэж сонирхоно. Энэ үйл ажиллагааг Сөүл хотын захиргаанаас санаачилж БНСУ-ын Orange Ocean компани болон Улаанбаатар хотын захиргаа, “Vitamin tree Gobi” компаниуд хамтран зохион байгуулж байна.  Эх сурвалж: www.polit.mn