Т.САЙХАН Тулгар төрийн 2228, Их Монгол Улсын 813, Ардын хувьсгалын 98 жилийн ой, Үндэсний эрх чөлөө, тусгаар тогтнолоо сэргээн мандуулсны 108 жил, Үндэсний их баяр наадмын босгон дээр Ерөнхийлөгч Х.Баттулга зарлиг гаргаж, өнөөдөр /07.08/ Төрийн цол, одон медаль хүртээлээ.    Төрийн соёрхолт, урлагийн гавьяат зүтгэлтэн, Чингис хаан одонт, хөгжмийн зохиолч Б.Шарав, Төрийн соёрхолт, ардын жүжигчин, хөгжмийн зохиолч Н.Жанцанноров нарт Хөдөлмөрийн баатар цол олгов. Энэ үеэр  Хөдөлмөрийн баатар  Б.Шарав “Хөгжмийн урлагт хоёргүй сэтгэлээр зүтгэж ирсний минь үр  шим юм даа.  Миний уран бүтээлийг үргэлж үнэлж дэмжиж байдаг ард түмэндээ баярлаж байна.  Монголын хөгжмийн урлагийг залуу үеийнхэн маань үргэлж өндөрт өргөж яваарай гэж  залуустаа захъя даа” гэв. Хөдөлмөрийн баатар  Н.Жанцанноров "Бид төрийнхаа хишгийн гүн хүндэтгэлтэй хүлээж авлаа.  Монголын хөгжмийн урлагийг үнэ цэнэтэй юм гэдгийг төр баталлаа. Монголын төрд төлөх өр дуусаагүй юм байна. Та бүхэн сайхан наадаарай ” гэлээ. Энэ үеэр  жүжигчин Д.Сүхбаатарт Монгол Улсын гавьяат жүжигчин цол хүртээлээ.  Тэрээр “Ацаг шүдний зөрөө” монголын уран сайхны киноны гол дүрээр үзэгчдэд мөнхөрсөн. Хамгийн сүүлд насаараа цэргийн алба хаасан бэлтгэл офицеруудын тухай өгүүлэх “Долоодугаар тусгай тасаг” киноны гол дүрд ахмад уран бүтээлчидтэй хамтран тоглосон юм.  Эх сурвалж:www.polit.mn