Ж.ЦОГЗОЛМАА Хонгконгийн хамгийн баян хүн гэгддэг Ли Ка Шин өөрийн сайн үйлсийн сангийн хөрөнгөөр Хятадын их сургуулиудад суралцаж буй оюутнуудын сургалтын төлбөрийн зээлийг төлөхөөр болсныг ВВС мэдээлэв. Ли Ка Шин сангаас Шантоу их сургуульд энэ оны хичээлийн жилд элсэн суралцах оюутнуудын сургалтын төлбөрийн зээлийг төлөх бөгөөд энэ хөтөлбөр нь таван жил үргэлжлэх юм. Өдгөө 90 настай ноён Ли-гийн хөрөнгө 30.4 тэрбум ам.доллараар хэмжигдэж буйг “Форбес” сэтгүүлд тэмдэглэжээ. Өнгөрсөн сард үүнтэй адилаар тэрбумтан Роберт Ф.Смит АНУ дахь коллежийн оюутнуудын сургалтын төлбөрийг төлсөн билээ. Тэгвэл ноён Ли-гийн санаачлагаар төлөгдөх нэг жилийн оюутны сургалтын төлбөрийн зээлийн эргэн төлөлт нь 100 сая юань буюу 14.4 сая ам.доллар байх аж. “Дэлхийн эдийн засгийн өрсөлдөөний чадамжийг хангасан мэргэжилтэн бэлтгэн гаргахад бидний үзүүлж буй энэхүү санхүүгийн дэмжлэг ихээхэн хувь нэмэр болно гэж итгэж байна” хэмээн тус сангаас мэдээлэв. Ноён Ли хар багаасаа л цэвэрлэх байгууламжийн ажил эрхэлсэн бөгөөд өдгөө тэрээр “Форбес”-ийн тэрбумтнуудын жагсаалтын 28 дугаарт бичигдэж байгаа юм. Тэрээр өнгөрсөн жил тэтгэвэрт гарсан бөгөөд том хүү Визтор Ли бизнесээ залгамжилсан байна. Ли-гийн гэр бүл “CK Hutchison Holdings” болон “CK Asset Holdings” зэрэг группийг эзэмшдэг бөгөөд жижиглэн худалдаа, холбоо харилцаа, эрчим хүчний салбарт үйлдвэрлэлээ явуулж байна. Ойролцоогоор 400 оюутан түүний энэхүү сайн үйлсийн хөтөлбөрт багтах тооцоолол гараад байгаа юм. Нийт төлөх зээлийн хэмжээ нь 40 сая ам.доллар байх төлөвтэй аж. Эх сурвалж: www.polit.mn