Ж.ЦОГЗОЛМАА Дэлхийн тэргүүн тэрбумтан, бизнесмэн Уоррен Баффеттай үдийн зоог барих уламжлалт хүндэтгэлийн арга хэмжээ болоход тун ойртжээ. Энэ талаар “Forbes” сэтгүүл “Манай гаригийн хамгийн баян хүнтэй нэг ширээнд тохой нийлүүлэн суух торгон агшныг өөрийн болгохын тулд хүмүүс нэг сая ам.доллар төлж байсан удаатай. Тэгвэл энэ удаад энэ эрхийг 4.5 сая ам.доллараар худалдан авсан нь түүхэн дээд амжилт боллоо” хэмээн онцолсон байв. Бараг таван сая ам.доллар төлсөн энэ эрхэм 28 настай Жастин Сан бөгөөд тэрээр санхүүгийн гуйвуулгын үйлчилгээний “Tron” компанийн үүсгэн байгуулагч аж. Тэгвэл Баффет энэхүү мэдээллийн дараа хэлсэн мэдэгдэлдээ “Үдийн зоог барих хүндэтгэлийн арга хэмжээний ялагч бүхэн мөнгөнийхөө үнэ цэнийг мэдрэх торгон агшныг өөрийн болгодог” гэсэн байна. Дэлхийд хөрөнгөөрөө дөрөвдүгээрт бичигддэг, хамгийн өндөр бүтээмжтэй хөрөнгө оруулагч хэмээн алдаршсан Уоррен Баффеттай зоог барих нь түүний томоохон гэрээ хэлцлүүд болоод хөрөнгө оруулалтын бодлогынх нь талаар өөрийн чихээр сонсч, бодит зөвлөмжүүдийг нь мэдэж авах үнэтэй цаг хугацаа билээ. Ийнхүү үдийн зоог барих хүндэтгэлийн уулзалтаа үнэ хаялцуулан ялагчаа тодруулах Баффет санаачлага 20 дахь жилдээ биеллээ олж буй бөгөөд орлогоо Санфранцискогийн орон гэргүй, эмзэг бүлгийнхэнд тусалдаг “Glide Foundation” санд өгөх юм. Үдийн зоогийн эрхийн төлөөх үнэ хаялцах худалдаа өнгөрсөн баасан гаригт өндөрлөжээ. 2016 онд анх удаа энэ эрхийг долоон найз хөрөнгөө нийлүүлэн 3.4 сая ам.доллараар худалдан авснаар түүхэн дээд амжилт тогтоож байлаа. Эх сурвалж: www.polit.mn