Д.ЧИМЭГ “Даяар Монгол” хөдөлгөөн, “Хөх Монгол” бүлгэмээс гурван асуудлаар мэдээлэл хийлээ. “Даяар Монгол” хөдөлгөөний зохицуулагч Хонхэрээдийн Б.Энхбат “Бид өнөөдөр гурван асуудлаар мэдээлэл хийнэ” гэсэн юм. Тэрээр Монгол Улсын Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нарт шаардлага хүргүүлж буйгаа дуулгав. Тус шаардлагад 2000 оноос хойш УИХ-ын баталсан хуулиудад ямар хувь хүн, лобби бүлэг засвар хийснийг шалгаж тогтоох Ажлын хэсэг байгуулахыг хүсч буйгаа илэрхийлсэн аж. Учир нь хэн нэгний ашиг сонирхолд нийцүүлэн дур мэдэн өөрчилдөг явдлыг халах хэрэгтэй хэмээн Б.Энхбат тайларлав. Түүнчлэн гадныхан болон мөнгөтэй, залилан мэхлэгчдийн захиалгаар хуулийг өөрчилдөг засвар хийдэг болоод 20 гаруй жилийг үдэж байна гэдгийг тэрээр онцолж байв. Тиймээс хуульд өөрчлөлт оруулсан процесс бүрийг нарийвчлан шалгаж олон нийтэд мэдээлэл хүргэх ёстойг анхааруулсан юм. Тухайлбал, хамгийн сүүлд гэхэд УИХ-ын гишүүн Ш.Раднаасэдийн хийсэн өөрчлөлтийг шалгах ёстой гэдгийг ч хэлж байлаа. Тэрээр цааш ярихдаа “Намайг гэмт хэрэгт холбогдон шоронд орох үед цаазаар авах ял авсан хүний хэргийг заавал УДШ-ээс хянан хэлэлцдэг байсан. Гэтэл одоо цаазаар авах ял авсан хүн УДШ-д гомдол гаргах эрхгүй болсон. Мөн Эрүүгийн хуульд маш ноцтой нэг өөрчлөлт оруулсан байна лээ. Тухайлбал, анхан шатны шүүхийн шүүгчийн захирамжийг Ерөнхий шүүгч хянадаг, УДШ-ийн шийдвэрийг эс зөвшөөрвөл Ерөнхий шүүгчид гомдол гаргаж бүх шүүгчдийн хурлаар хянан хэлэлцдэг байсан. Харамсалтай нь энэ зүйл заалтыг өөрчилсөн байна. Тэгэхээр төрийн хуулийг хулгайч нарт ашигтайгаар өөрчилсөн хүмүүсийг шоронд суулгадаг болгоё” хэмээн эхний асуудлаа тайлбарлав. Хоёрдугаарт, УИХ-ын гишүүн Монгол Улсын иргэдээ алагчлан үзэж болохгүй гэлээ. Учир юу гэвээс УИХ-ын гишүүн Б.Дэлгэрсайхан шоронгийн хулгайч хүн хөдөлгөөн өрнүүлж болохгүй гэж адалсныг дуулгалаа. Хэдийгээр алдаж оноод хэцүү нэртэд суусан ч улсынхаа хөгжил цэцэглэлтэд хувь нэмрээ оруулсан олон аавын хүү бий гэдгийг Б.Энхбат тодотгов. Тиймээс болчимгүй үг хэлж, хүмүүсийг алагчилж үзсэн эрхэм гишүүн ард түмнээсээ уучлалт гуйх ёстой гэлээ. Гуравдугаарт, гадаадын 100 хувийн хөрөнгө оруулалттай ашигт малтмалын салбарт ажиллаж байгаа компаниуд татвар төлөхөөс зайлсхийдэг болжээ. Тухайлбал, Дорноговь аймагт үйл ажиллагаа явуулдаг “Меню Ши ши”, “Баян-Ундарга” компани 2006 оноос хойш ажиллаж байгаа боловч 200 гаруй сая төгрөгийн татварыг төлөөгүй байгаа тухай мэдээлэв. Тиймээс энэ компаниудын тусгай зөвшөөрлийг цуцлаж өгөөч гэдэг хүсэлтийг Ерөнхий сайд У.Хүрэлсүх болон АМГТГ-т албан ёсоор гаргаснаа дуулгалаа. Эх сурвалж: www.polit.mn