Ж.ЦОГЗОЛМАА ОХУ-ын өдөр тутмын сонин “Комерсант”-ын хоёр ахлах редактор болон 10 сэтгүүлч өнгөрсөн даваа гаригт халагдах өргөдлөө өгөхөд хүрснээ мэдэгдсэнийг “Ройтерс” дамжуулав. Ерөнхийлөгч В.Путины ойрын холбоотнуудын халаа сэлгээний талаар бичсэн нийтлэлийнх нь эсрэг маргаж буй хамт ажиллагч талуудын байр суурь үүнд нөлөөлжээ. “Комерсант”-ын улс төрийн мэдээллийн албанд энэхүү үйл явц өрнөжээ. Сонины эзэн болон сонины ажилтнуудын дунд энэ маргаан өрнөсөн байна. Тус сонин нь хойд хөршийн улсын мэдлийн хэвлэл хэмээн алдаршсан билээ. Сурвалжагчид болох Иван Сафронов болон Максим Иванов нар тэрбумтан бизнесмэн Алишер Усмановын эзэмшдэг энэ сонинд  өнгөрсөн сард бичсэн нийтлэлийг нь ихээхэн шүүмжилсний дараа ийнхүү ажлаа өгөхөөр шийдсэн аж. 2006 онд Усманов “Комерсант” сониныг эзэмшдэг болсон бөгөөд “Ройтерс”-т тайлөар өгөөгүй байна. Усмановын төлөөлөгч хэд хэдэн удаа “Хувь эзэмшигч сэтгүүлчдийн ажил эрхлэхтэй холбоотой шийдвэр гаргахад нь саад болохгүй” гэж байсан юм. Түүнчлэн төлөөлөгч “Нийтлэлээс болсон сэтгүүлчдийн энэхүү маргааны талаар Усманов судалж байгаа” гэжээ. Өнгөрсөн сарын 17-нд нийтлэгдсэн тус нийтлэлд нэрээ нууцалсан эх сурвалж парламентын спикер Валентина Матвиенкогийн оронд Гадаад тагнуулын албаны дарга Сергей Нарушкиныг томилох төлөвтэй байгаа эсэх талаар асуулт тавьсан байжээ. Асуултын хариулт нь тодорхойгүй үлдсэн байв. Матвиенко болон Нарушкин нарын төлөөлөгч энэ талаар тайлбар өгөхөөс татгалзсан бөгөөд “Комерсант”-ын цахим хуудаст одоо ч нийтлэгдсэн хэвээр буй энэ нийтлэлийг “цуурхал” хэмээн мэдэгдсэн юм. Эх сурвалж: www.polit.mn