Ж.ЦОГЗОЛМАА Тэрбумтан, хөрөнгө оруулагч Роберт Смит АНУ-ын Жеоржиа муж дахь Атланта хотын Моүрхаузын коллежийн төгсөгч оюутнуудад гэнэтийн бэлэг барьсан талаар “Ройтерс” агентлаг мэдээлэв. Тэрээр энэ онд төгсч буй оюутнуудын оюутны зээлийг тэр чигт нь төлж барагдуулахаа ёслолын ажиллагааны үеэр хийсэн илтгэлдээ онцолсон юм. “2019 оны төгсөгчдийн анги бол миний анги. Манай гэр бүл энэ оны төгсөгчдийн оюутны зээлийг ийнхүү төлж дуусгахдаа баяртай байх болно” гэж оюутнуудтай хувцсаараа ижилссэн Смит илтгэлийнхээ үеэр хэлсэн байна. “Vista Equity Partners” үнэт цаасны хөрөнгө оруулалтын фирмийн үүсгэн байгуулагч, гүйцэтгэх захирал түүний хөрөнгө өнгөрсөн оны байдлаар 4.4 тэрбум ам.долларт хүрсэн хэмээн “Форбес” сэтгүүлд тэмдэглэжээ. АНУ-д хар арьст оюутнуудын сурч төгсдөг 100 гаруй коллежийн нэг нь энэхүү Моүрхауз бөгөөд түүхэн сургууль гэдгээрээ алдартай. 1964 онд иргэний эрхийн хөдөлгөөний үеэр энэхүү сургуулийн эрхийг хасч байсан юм. Иргэний эрхийг хамгаалагч баатар Мартин Лютер Кинг энэ түүхэн сургуулийн төгсөгч билээ. Ирэх жил болох АНУ-ын Ерөнхийлөгчийн сонгуульд нэр дэвшигчдийн хувьд оюутны зээлийн асуудал нь санал авах гол сэдэв болоод байна. Зарим нэр дэвшигч ихээхэн хэмжээний зээлийг цуцлах талаарх санал ч гаргаад байгаа юм. Эх сурвалж: www.polit.mn