Т.САЙХАН Судлаач Д.Ганхуяг УИХ-ын гишүүн асан Д.Гантулгыг бүрэн эрхээс нь чөлөөлсөн УИХ-ын тогтоол Үндсэн хууль зөрчсөн гэж үзэж, гомдлоо тавдугаар сарын 6-ны өдөр Цэцэд өгсөн. Ингэхдээ "Монгол Улсын Үндсэн хуулийн Жаран зургадугаар зүйлийн 2 дахь хэсгийн 1 дэх заалт, Монгол Улсын Үндсэн хуулийн цэцийн тухай хуулийн 9 дүгээр зүйлийн 1 дэх хэсэг,Үндсэн хуулийн цэцэд маргаан хянан шийдвэрлэх ажиллагааны тухай хуулийн 16 дугаар зүйлийн 1 дэх хэсэгт заасныг үндэслэн энэхүү мэдээллийг гаргаж байна" гэжээ. Тэгвэл үүнтэй адилхан дахин хоёр ч өргөдөл Үндсэн хуулийн Цэцэд дахин  иржээ. Тодруулбал, судлаач Д.Ганхуяг гомдол гаргасны дараа дахин хоёр иргэн хамтран гомдол гаргасан бол бас нэг иргэн дангаараа Д.Гантулгыг чөлөөлсөн нь Үндсэн хууль зөрчсөн гэсэн гомдол гаргаад байгаа юм байна. Үндсэн хуулийн Цэцэд гомдол ирсэн тохиолдолд Цэцийн гишүүн хүлээн авч, гомдол хүлээн авснаас хойш 14 хоногийн дотор маргаан үүсгэх эсэхийг шийдэх учиртай .Хэрэв гомдол хүлээж авсан Цэцийн гишүүн маргаан үүсгэх шийдвэр гарсан тохиолдолд 30 хоногийн дотор Цэцийн хуралдаанд бэлтгэх ёстой. Хуралдаанд бэлтгэсний дараа хуралдааныг товлоно. Нөгөө талаар Үндсэн хуулийн Цэц Үндсэн хуулийн зөрчлийн шинж агуулаагүй гэх үндэслэлээр иргэдийн өргөдөл, мэдээллээр маргаан үүсгэхээс татгалзах шийдвэр гаргахыг үгүйсгэж болохгүй. Одоогоор энэ асуудлаар Үндсэн хуулийн Цэц маргаан үүсгэх эсэх шийдвэрээ гаргаагүй байгаа юм. Эх сурвалж:www.polit.mn