Л.БАТДОРЖ Монголын параглайдингийн нийгэмлэг нь Нийслэлийн аялал жуулчлалын газраас зохион байгуулсан “Улаанбаатарын өвлийн наадам-2019” арга хэмжээний хүрээнд Параглайдингийн Улаанбаатар хотын аварга шалгаруулах тэмцээнийг цэг онож буух төрлөөр энэ сарын 16, 17-нд Богдхан уулын Хүрхрээгийн аманд амжилттай зохион байгууллаа. Нээлтийн үеэр манай нисэгчид Монгол Улсын төрийн далбаа, НАЖГ-ын туг мөн ивээн тэтгэгч байгууллагуудын тугтай нислэг хийж сонирхуулахын зэрэгцээ, амьтны дүрс хийж нисч үзүүллээ. Улаанбаатар хотын аварга шалгаруулах тэмцээнд 22 тамирчин оролцсоноос 15 эрэгтэй, долоон эмэгтэй оролцсон байна. Тэмцээний шагналт байранд: Эрэгтэйчүүдийн ангилалд: Тэргүүн байр – А. Батдаваа /175 оноо/ Дэд байр – Л. Будсүрэн /1155 оноо/ Гутгаар байр – Э. Амарсайхан /1501 оноо/ Эмэгтэйчүүдийн ангилалд: Тэргүүн байр – Т. Чулуунбат /827 оноо/ Дэд байр – Д. Оюумаа /1874 оноо/ Гутгаар байр – Б. Болормаа /1924 оноо/ нар эзэллээ. Мөн түүнчлэн АНУ-аас Doug Gilchrist хэмээх нисэгч оролцон IV байрт орсон юм. Тэмцээн хоёр өдөр өрсөлдөөнтэй, сонирхолтой, аюулгүй амжилттай болж өндөрлөлөө. Параглайдинг цаг агаарын нөхцөл, нисэгчийн ур чадвар, төлөвшил, зөв шийдвэр гаргах чадвараас их хамаардаг. 12-80 настай хэн ч байсан энэ спортоор хичээллэх боломжтой. Тус спортоор суралцахыг хүссэн хүн бүхэнд нээлттэй бөгөөд Монгол параглайдинг клуб болон манай туршлагатай нисэгчид анхан шатны сургалтыг заах юм байна. Олон улсад ParaPro 1-5 төвшинг анхан шатнаас эхлээд гүнзгий төвшинд сургах ажээ. Та нисч эхэлмэгцээ нисэгч болно. Гэхдээ та сайн суралцах хэрэгтэй. Мэргэжлийн нисэгч болоход олон жил шаардагддаг. Эх сурвалж www.polit.mn