П.АМГАЛАН

Өвлийн тэргүүн сарын шинийн нэгэн, Эзэн Богд Чингис хааны мэндэлсний 861 жилийн ой, Монгол бахархлын өдрийн хүрээнд Монгол Улсын төрийн дээд шагнал, тэргүүн зэргийн "Чингис хаан" одонг Морин хуурын чуулгад хүртээх ёслол Төрийн ордонд боллоо.

"Чингис хаан одон"-г их эзэн Чингис хааны мэндэлсний ой буюу "Монгол бахархлын өдөр"-өөр улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан иргэнд хүртээдэг уламжлалтай.  Энэ жил  "Морин хуурын чуулга" "Чингис хаан одон"-г гардан авлаа.

2004 онд Монгол Улсын хоёр дахь Ерөнхийлөгч Н.Багабандийн гаргасан санаачилгыг УИХ сайшаан дэмжиж, УИХ-ын 21 дүгээр тогтоолыг баталж байсан ба дараах эрхэм хүндтэй хүмүүс "Чингис хаан одон"-г  хүртэж байжээ.

-2005 онд Монгол Улсын анхны Ерөнхийлөгч Пунсалмаагийн Очирбат   

-2006 онд Төрийн шагналт хөгжмийн зохиолч Бямбасүрэнгийн Шарав    

-2009 онд Монгол Улсын Ерөнхий сайд асан Дашийн Бямбасүрэн    

-2010 онд Төр, нийгмийн зүтгэлтэн Раднаасүмбэрэлийн Гончигдорж    

-2011 онд Монгол Улсын Ерөнхийлөгч асан Нацагийн Багабанди    

-2012 онд УИХ-ын гишүүн асан Дамдины Дэмбэрэл    

-2013 онд Монгол Улсын Ерөнхий сайд асан Думаагийн Содном    

-2014 онд нэрт эрдэмтэн, физикч Хавтгайн Намсрай    

-2015 онд Монгол Улсын Соёлын гавьяат зүтгэлтэн, нэрт зохиолч, яруу найрагч Гомбожавын Мэнд-Ооёо    

-2016 онд Монгол Улсын гавьяат жүжигчин, дуурийн дуулаач Ганбаатарын Ариунбаатар    

-2017 онд Монгол Улсын гавьяат тамирчин, Монгол улсын хөдөлмөрийн баатар олимпын аварга Найдангийн Түвшинбаяр    

-2019 онд Монгол үндэстний хөгжмийг рок дуугаралттай хослуулсан Монгол рок буюу Хүннү рок урсгалаар тоглодог Хү хамтлаг     -2021 онд Монгол улсаас сансарт ниссэн цорын ганц, дэлхийн 101 дэх, Азийн хоёр дахь сансрын нисгэгч бөгөөд нислэгийн инженер, хошууч генерал Жүгдэрдэмидийн Гүррагчаа    

-2021 онд Монгол Улсын Зэвсэгт Хүчин    

-2022 онд АНУ-ын монголч эрдэмтэн доктор, профессор Жэк Уэтерфорд болон Газар зүй, геоэкологийн хүрээлэнгийн эрдэм шинжилгээний тэргүүлэх ажилтан, доктор, профессор Д.Доржготов нар    

-2023 онд Морин хуурын чуулга хүртлээ.

Эх сурвалж:www.polit.mn