Т.САЙХАН

БНХАУ-ын их, дээд сургуульд суралцагч гадаадын оюутнууд 2022 оны наймдугаар сарын 22-ны өдрөөс эхлэн сургалтын урт хугацааны виз мэдүүлж, визээ авсны дараа танхимаар суралцах боломжтой болсон. Тэгвэл тус улс руу үйлдэх нислэгийн тоо хангалтгүй байгаагийн улмаас эрэлт нэмэгджээ. Тиймээс Гадаад харилцааны яамнаас Монгол, Хятадын хоорондын нислэгийн тоог нэмэгдүүлж, долоо хоногт зургаан удаа нислэг үйлдэх асуудлыг Хятадын талтай тохиролцсон юм.

Улмаар энэ сарын 8-ны өдрөөс эхлэн хоёр улсын хооронд долоо хоногт зургаан удаагийн нислэг үйлдэхээр ярилцсан байна. Энэ талаар ИНЕГ-ын Агаарын тээврийн бодлого зохицуулалтын газрын дарга Г.Батбаяраас "Есдүгээр сарын 8-наас нислэг үйлдэж эхэлнэ гэдэг нь яг тодорхой болоогүй байна. Гэхдээ энэ сард багтаж нислэг үйлдэж эхэлнэ гэж тооцоолж байгаа. Ямартай ч хятадын талаас гурван удаа, монголын талаас гурван удаа нислэг үйлдэхээр талууд тохиролцоод байгаа. Нэг давтамж нь Хөх хот руу нисэхээр бэлтгэл хангаж байна. Өвөр Монголын талаас зөвшөөрөл авчихсан байгаа. Одоо Хөх хотын зөвшөөрөл хүлээгдэж байна. Аль чиглэлээс нисэх нь одоогоор тодорхойгүй байна. Ямартай ч эхний ээлжид Монголд ажиллаж байгаа хятад ажилчдыг болон БНХАУ-д суралцдаг оюутнуудыг тээвэрлэх төлөвлөгөөтэй байна. Нислэгийг МИАТ, Эйр Чайна, Аэро Монголиа гэсэн гурван авиа компани үйлдэнэ" гэв.

Эх сурвалж:www.polit.mn