Т.САЙХАН

УИХ-аас 2026 оны долдугаар сарын 02-ны өдөр баталсан хуулиар цэргийн тэтгэвэр авагчдад суурь тэтгэвэр нэмж олгох зохицуулалт хэрэгжиж эхлээд байна. Өөрөөр хэлбэл, өмнө нь тогтоолгосон цэргийн тэтгэвэр дээр суурь тэтгэвэр нэмж авах боломж бүрдсэн гэсэн үг. Гэхдээ уг нэмэгдлийг эрэгтэй 60, эмэгтэй 55 нас хүрсэн иргэдэд олгохоор хязгаарлаад байна. Цэргийн тэтгэвэр авагчдад суурь тэтгэвэр олгохтой холбоотойгоор бэлтгэл болон чөлөөнд байгаа алба хаагчид санал, хүсэлтээ илэрхийлж байна.Энэ асуудалд Батлан хамгаалахын сайд Д.Батлут анхаарал хандуулж, байр сууриа илэрхийлэх нь зүйтэй хэмээн мэдэгджээ. Тэрээр, “Өндөр хариуцлага, эрсдэлтэй онцгой нөхцөлд, цаг наргүй ажиллаж, хуулийн дагуу цэргийн тэтгэврээ 40, 50-тайдаа тогтоолгосон иргэд 55, 60 нас хүртлээ хүлээх хэрэгцээ үүсээд байна. Иймээс цэргийн тэтгэвэр авах эрх үүссэн нас болон суурь тэтгэвэр олгох насны шалгуурын уялдааг дахин авч үзэх шаардлагатай гэж үзэж байна.Миний бие УИХ-ын даргын 95 дугаар захирамжаар байгуулагдсан Ахмад настны тэтгэвэр, тэтгэмж, нийгмийн хамгааллын асуудлаарх ажлын хэсгийн бүрэлдэхүүнд ажиллаж, яг энэ асуудлыг хөндөн, өөрчлөлт оруулахаар ажиллаж байна.Энэхүү санал, дүгнэлтийг 2026 оны аравдугаар сарын 28-нд УИХ-ын Хүний хөгжил, нийгмийн бодлогын байнгын хорооны хуралдаанд танилцуулсан, шаардлагатай өөрчлөлтийг хийж, шийдвэрлэхийн төлөө ажиллаж байна.Эх орныхоо аюулгүй байдлын төлөө олон жил зүтгэсэн цэргийн алба хаагчдын хөдөлмөрийг үнэлж, тэдний нийгмийн баталгааг сайжруулах нь Батлан хамгаалах салбарын бодлогын чухал зорилт хэвээр байх болно” гэв.

Эх сурвалж:www.polit.mn