Б.ОД

Ардчилсан Намаас цаг үеийн асуудлаар өнөөдөр мэдээлэл хийлээ. 

Тус намын ерөнхий нарийн бичгийн дарга Ч.Өнөрбаяр "О.Цогтгэрэл намын бүлгийн дарга гэж өөрийгөө хэлэх хууль зүйн үндэслэл байхгүй. Ямар ч бүлгийн дарга огцрохгүй хуультай болсон. Яагаад гэвэл бүлгийн дарга өөрийгөө огцруулах хуралд суухгүй бол хэзээ ч огцрохгүй хуулийг баталсан.  АН-ын нэрийг барьсан зарим нэг хүмүүс Л.Оюун-Эрдэнийн Засгийн газрын шинэ бүрэлдэхүүнд орох яриа гараад байна. Үүнийг бид хэзээ ч хүлээн зөвшөөрөхгүй. Сайдаар ажиллахгүй бол өлсөж үхэх гээд байгаа юм уу?.Үндсэн хуулийн цэц МАН-д байж болох хэмжээндээ үйлчилж байна. Эрх баригчдын бодлогыг зөвтгөдөг ордны профессорууд бий болсон байна" гэлээ. 

Харин АН-ын Хууль зүйн асуудал хариуцсан нарийн бичгийн дарга О.Баасанхүү "Хэн дарга болох, эрх мэдэлд хэрхэн хүрэх вэ гэдэг зүйлүүдээ больмоор юм. Ерөнхийлөгч асан Х.Баттулгад хандаж хэлэхэд танд хуульчид буруу зөвлөгөө өгөөд байна. Итгэмжлэлгүй төлөөлнө гэж зүйл байхгүй. Намын дүрэм гэж бий. Үндсэн хуулийн 19, 21 дүгээр зүйлийг зөрчсөн гээд гомдол гаргаад, тухайн гомдол нь маргааныг үүсгэх эсэх асуудал өнөөдөр шийдэгдэх гэж байгаа. Нэгэнт маргаан үүсвэл хууль автоматаар хүчин төгөлдөр бус болно. Өнөөдөр үйлчилж буй хуулийн дагуу бүлгийн нийт гишүүдийн олонхын саналаар гэдэг нь нийт гишүүд хуралд орох ёстой гэсэн үг. Төрийг хүчгүй болгохын төлөө МАН-ынхан хоорондоо сайдын суудал булаацалдаж байгаа нь ил гарлаа" гэв.

Эх сурвалж:www.polit.mn