П.АМГАЛАНБАЯР

Үндэсний бөхийн салбар  хорооноос допингтой холбоотой цаг үеийн асуудлаар мэдээлэл хийлээ. Энэ үеэр тус хорооны дарга П.Сайнзориг " Баяр наадамд тодорхой амжилт үзүүлсэн бөхчүүдээс допингийн шинжилгээ авч, хариу нь эцэслэгдэж ирсэн. Энэ жилийн Үндэсний их баяр наадмаас эхлэн, дөрөв түүнээс дээш давсан  64 бөх болон 16 харваачаас допингийн шинжилгээ авсан. Тодруулбал, допингийн шинжилгээ өгсөн 64 бөхийн хамгийн сүүлийн хариу наймдугаар сарын 19-ний өдөр ирсэн.  Ингэхэд нэг бөхөөс допинг хэрэглэсэн гэсэн шинжилгээний хариу Монголын үндэсний допингийн төвөөр дамжуулж ирсэн. Допинг хэрэглэсэн гэсэн хариу гарсан бөх Үндэсний их баяр наадмын тавын даваанд унасан. Одоогоор бөхийн нэрийг хэлэх боломжгүй. Бид тухайн бөхөд шинжилгээний хариуг биечлэн танилцуулж, дараагийн шатны буюу B сорьцны шинжилгээнд орох эсэхийг асууна. Хэрэв тухайн тамирчин допингийн шинжилгээг хүлээн зөвшөөрч дахин шинжилгээнд орохгүй гэвэл бөхийн нэрийг  нийтэд мэдээлнэ.  Харин дахин шинжилгээнд орно гэвэл хариу гартал бөхийн нэрийг нууцална" гэлээ. Тухайн тамирчин дараагийн шатны шинжилгээнд орох эсэхээ хариугаа есдүгээр сарын 1-ний дотор өгөх юм байна.

Эх сурвалж:www.polit.mn