П.Амгаланбаяр

 Жүдо бөхийн насанд хүрэгчдийн  Ази тивийн аварга шалгаруулах тэмцээн энэ сарын 4-7 нд Казахстаны нийслэл Нурсултан хотноо болсон. Тэмцээнд эх орноо төлөөлөн оролцсон манай баг жүдочид хоёр алт, таван хүрэл медаль хүртэж,  багийн дүнгээр хоёрдугаар байрт шалгарлаа. Тус тэмцээний эхний өдөр шигшээ багийн тамирчдаас эрэгтэйчүүдийн 66 кг-д Ё.Басхүү Японы бөхийг цэвэр ялж Ази тивийн аварга болсон. Мөн эмэгтэйчүүдийн 48 кг-д Г.Наранцэцэг, 52-д Б.Хорлоодой нар хүрэл медаль хүртлээ. Мөн энэ өдөр эрэгтэйчүүдийн 60 кг жинд Э.Ариунболд, Э.Сумъяабазар /хоёул V байр/, 57 кг-д М.Ичинхорлоо /V байр/, Л.Энхрийлэн /VII байр/ нар хүчээ сорьсон юм. Харин хоёр дахь өдрийн тэмцээнд эмэгтэйчүүдийн 63 кг-д Б.Ганхайч бүх өрсөлдөгчөө ялж Ази тивийн аваргын алтан медаль хүртлээ. Улмаар эрэгтэйчүүдийн 90 кг-д Г.Алтанбагана, эмэгтэйчүүдийн 70 кг-д Ц.Энхчимэг нар хүрэл медалийн эзэд болсон юм. Мөн эрэгтэйчүүдийн -100 кг-д Б.Гончигсүрэн хүрэл медаль хүртсэн.

Эх сурвалж:www.polit.mn