Ч.ГАНТУЛГА

Бид энэ удаагийн “Кино ертөнц” буландаа найруулагч Ж.Сэнгэдоржийн “Xудалдагч охин” киноны тухай мэдээлэл хүргэхээр бэлтгэлээ. Тус бүтээл нь Осакагийн олон улсын кино наадмаас шилдэг дүрийн шагнал хүртсэн бол хэдхэн хоногийн өмнө АНУ-д болсон “New York Asian Film Festival 2022" наадмаас "Шилдэг кино" шагналыг эх орондоо авчраад байна. 

Өөрийгөө олсон найруулагч 

Найруулагч Ж.Сэнгэдоржийг бид анх Монголын хошин урлагийг үндэслэгч Л.Жанчивдоржийн хүү гэдгээр нь таньдаг байв. Харин одоогоос 20 гаруй жилийн өмнө Монголын кино урлагийн салбарт тэрбээр “Мөрөөдлийн хөлөг онгоц” киноны найруулагчаар анхлан хөл тавьсан түүхтэй. Тэр цагаас хойш “Бодлын хулгайч”, “Лардьма”, “Үргээлэг”, “Цагаан хадаг”, “Lovers” зэрэг даацтай бүтээлүүдийг хийсэн чадварлаг уран бүтээлч. Ж.Сэнгэдорж нэгэн ярилцлагадаа “Найруулагч хүн 40-60 насандаа өөрийгөө олдог. 60 наснаас хойш жинхэнэ бүтээл хийнэ гэдэг ч юм уу. Найруулагч гэдэг чинь насаараа кино хийдэг хүн шүү дээ” гэсэн нь бий. Тэгвэл Ж.Сэнгэдорж найруулагчийн хувьд хэдийнэ  50 нас руу дөхсөн. Тиймээс энэ цаг үед түүнийг жинхэнэ өөрийгөө олсон найруулагч гэж тодорхойлж болно. Үүнийгээ тэрбээр “Худалдагч охин” киногоор батлаад байна. Ж.Сэнгэдорж 2010 онд Японы олон улсын кино наадамд “Хүчилтөрөгч” киногоор оролцож, монгол хүний сэтгэлзүй, өвөрмөц ахуй, хөдөөгийн дүр зургийг япончуудад “гайхуулж” байв. Харин энэ удаад огт өөр төрх, шинэ үеийн залуусын сэтгэлгээг өвөрмөц, шинэлэг байдлаар харуулсан нь содон байжээ.  

Саруул ба Баярцэцэг 

"Худалдагч охин" киноны гол дүрийг жүжигчин О.Энхтуул, Б.Баярцэцэг нар бүтээсэн билээ. Тус бүтээлийн Саруулын дүрээр залуу жүжигчин Б.Баярцэцэг Осакагийн олон улсын кино наадмаас шилдэг дүрийн шагнал хүртсэн юм. Киноны гол хүч, амин сүнс нь гол дүр байдаг. Найруулагчийн хэлэх гэсэн санааг жүжигчин мэдрэмж, тоглолт, хувирлаараа илэрхийлэх учиртай. Залуу жүжигчний хувьд “Худалдагч охин” кино анхны гол дүр нь байв. Тэрбээр дүрийнхээ тухай “Саруулын дүр надтай 70 хувь төстэй. Тиймээс энэ дүр дээр ажиллахад илүү ойр байлаа. Киног манай гэрийнхэн үзээд намайг яг л өөрөөрөө тоглосон байна гэж урамшуулсан” хэмээн сэтгэгдлээ илэрхийлж байсан юм. Б.Баярцэцэгийн хувьд энэхүү киноноос өмнө  хөгжилтэй контентоор үзэгчидтэй уулздаг байв. Үүнээс гадна тэрбээр платформ бизнес хийдэг бөгөөд хүмүүст сургалт ордог гэнэ. Цаашид энэхүү бизнесээ өргөжүүлж компани болгох хүсэлтэй ажээ. 

Эх сурвалж: "Зууны мэдээ" сонин

2022 ОНЫ НАЙМДУГААР САРЫН 5. БААСАН ГАРАГ. № 149 (6881)