Б.ДАРЬСҮРЭН

Иргэний нийгмийн хөдөлгөөний төлөөллөөс төрийн түшээд, эрх бүхий албан тушаалтнуудыг банк санхүүгийн байгууллагаас хууль бусаар авсан, хугацаа хэтрүүлсэн зээлээ яаралтай төлөхийг шаардлаа. Тэд Сүхбаатарын талбайд суулт зарлаад зургаа хонож байгаа ч одоогоор дорвитой үр дүн гараагүй байгаа аж. Улмаар УИХ-ын Тамгын газарт дараах шаардлагыг хүргүүлэхээр болжээ. Шаардлагад "Өнөөгийн шийдвэрлэвэл зохих олон асуудлаас Хөгжлийн банкны зээлийн асуудлыг онцоллоо. Улс төрчид, төрийн түшмэд энэ асуудалд холбогддог нь олны анхааралд байсаар байхад хугацаа алдаж буйд бухимдаж байна. Монгол Улсын Үндсэн хуулийн 2.14.1-д Монгол Улсад хууль ёсоор оршин суугаа хүн бүр хууль шүүхийн өмнө эрх тэгш байна гэж заасан байтал өр зээлийн асуудалд холбогдсон албан тушаалтнуудын хэргийг хэт зөөлөн үзэж, ул мөрөө баллах боломжийг олгож байгааг эсэргүүцэж байна. Энэ байдал үргэлжилвэл бид тэмцлийн дараагийн хэлбэрийг сонгож, тэмцэнэ. Шаардлагын хариуг долоо хоногийн дотор хэвлэл мэдээллийн хэрэгслээр өгөхийг сануулж байна" гэжээ. Мөн тэмцэлд нэгдэхийг хүссэн бүр оролцож, гарын үсгээ зурах боломжтой гэж "Гүрэн Монгол" хөдөлгөөний дэд тэргүүн Э.Өлзийсаруул хэллээ.

Эх сурвалж: www.polit.mn