А.ТОГТОХТӨР

Таван удаагийн Дэлхийн шилдэг хөлбөмбөгчин, бүх цаг үед хамгийн олон гоолыг өрсөлдөгчийнхөө хаалганд “зоосон” агуу тоглогч Кристиано Роналдогийн хувьд аваргуудын лигийг өнжинө гэдэг бол байж боломгүй зүйл. Харамсалтай нь өнгөрсөн улиралд тэрбээр Манчестер хотдоо буцаж ирээд аваргуудын лигийн шөвгийн 16-гийн шатнаас хасагдаж, лигт зургадугаар байрт бичигдэн топ дөрвөөс мултарсан.   Мөн  шинэ улирлын бэлтгэлд гэр бүлийн асуудлаас болоод оролцоогүй бөгөөд  саяхнаас түүнийг Манчестер Юнайтед клубээс явахыг хүсэж байна гэсэн яриа хөлбөмбөг сонирхогчдын дунд гараад байгаа юм.

Нэмж хэлэхэд, алдарт тамирчны бие төлөөлөгч Хорхе Мендесийн холбогдоогүй Европын топ клуб бараг үлдээгүй. Тэрбээр өнгөрсөн хэд хоног тун завгүй өнгөрүүлсэн ба “Барселона” багийн ерөнхийлөгч Хоан Лапортагийн хамт оройн хоолонд орсон талаар мэдээлэл гараад байсан билээ.

Мэдээж Роналдо шиг супер тоглогчийг авахыг хүсэхгүй баг үгүй. Харин түүний цалинг өгч чадах эсэх нь л эргэлзээтэй. Мөн хөлбөмбөгт ч гэлтгүй бусад спортод 37 гэдэг бол карьерын оргил үе биш нь ойлгомжтой. Роналдогийн хувьд Манчестер Юнайтед клубээс долоо хоногийн 614 мянган ам.долларын цалинг авч байгаа ба энэ нь түүнийг Английн лигийн хамгийн өндөр цалинтай тоглогч болгож байгаа юм. Энэ цалинг топ багууд түүнд өгөхөд хараахан бэлэн биш байна. Жишээ нь, “Байерн Мьюнхэн”-ийн гүйцэтгэх захирал Oliver Kahn хэлэхдээ “Тэр манай системд тохирох тоглогч биш” гэж хэлсэн. Үүгээрээ Роналдог авах бодолгүй байгаагаа бүрэн илэрхийлсэн юм.

Ямартай ч түүний Юнайтед-тай байгуулсан гэрээнд дахин нэг улирал үлдсэн. Тэр одоо ч Улаан чөтгөр хэвээрээ.   

Эх сурвалж:www.polit.mn