Б.ДАРЬСҮРЭН

Улсын хэмжээнд тусгай хамгаалалттай газрын сүлжээнд болон орон нутгийн байгаль орчин, аялал жуулчлалын газрын харъяанд 1000 гаруй хамгаалагч Байгаль орчны салбарын 30 орчим хуулийн хэрэгжилтийг хангаж ажилладаг. Үүнээс улсын тусгай хамгаалалттай сүлжээнд орон тооны болон гэрээт 470 гаруй байгаль хамгаалагч ажилладаг. Тэдгээрийн цалин хангамж, бусад нийгмийн асуудлыг шийдвэрлэх шаардлагатай байгаа юм.

Байгаль хамгаалагчид эзгүй хээр ганц гэрээрээ ч байрших тохиолдол гардаг тул гэр бүлийн нийгмийн асуудалд анхаарах, орлогыг нь нэмэгдүүлэх, амь нас, эрүүл мэндийг нь ч хамгаалах асуудал хөндөгддөг талаар БОАЖ-ийн сайд Б.Бат-Эрдэнэ онцолж байна. Судалгаагаар нийт гурван байгаль хамгаалагч тутмын нэг нь халдлагад өртсөн гэсэн дүн байдаг. Тиймээс нэн тэргүүнд байгаль хамгаалагчдыг гэнэтийн ослын даатгалд бүрэн хамруулах чиглэлээр Байгаль орчин, аялал жуулчлалын сайд Б.Бат-Эрдэнэ холбогдох албаны хүмүүстэй уулзалт хийж, ажил хэрэг болгохоор санал солилцов. Энэ санаачилга хэрэгжсэнээр жилийн 365 хоногийн 280 гаруй хоногт хөдөө хээр ажиллаж байнгын эрсдэл дунд ажилладаг хамгаалагчдын амь нас, эрүүл мэндийг гэнэтийн болзошгүй аваар, ослоос бүрэн хамгаалж, эрсдлийг даатгуулах боломж бүрдэх юм.

Эх сурвалж: www.polit.mn