Б.ДАРЬСҮРЭН

Монгол Улс болон ХБНГУ-ын Засгийн газар хоорондын хэлэлцээрийн хүрээнд БОАЖЯ-ны хэрэгжүүлж буй “Биологийн олон янз байдлыг хамгаалах, уур амьсгалын өөрчлөлтөд дасан зохицох” төсөл хэрэгжиж буй. Уг төслийн II, III үе шатны хүрээнд Увс, Баян-Өлгий, Ховд, Говь-Алтай, Баянхонгор аймгуудын БОАЖГ болон ТХГН-ийн хамгаалалтын захиргаадын 220 байгаль хамгаалагчид зориулсан эрүүл мэндийн урьдчилан сэргийлэх үзлэг, хөдөлмөрийн аюулгүй байдал, эрүүл ахуйн сургалтыг энэ сарын 17-28-ны өдөр зохион байгуулж ажиллаж байна.

Сургалт, үзлэгт хамрагдсанаар байгаль хамгаалагчид хөдөлмөрийн аюулгүй байдал, эрүүл ахуйн цогц мэдлэг, хууль эрх зүйн мэдээллийг авч, тэдний дунд зонхилон тохиолдож буй (ажил, мэргэжлээс шалтгаалсан) өвчлөлийг эрт илрүүлэн, нарийн мэргэжлийн эмч нараас зөвлөгөө авч эрүүл мэнддээ анхаарах боломж бүрдэж байна. Байгаль хамгаалагч нь ажил үүргээ гүйцэтгэх явцад хөдөлмөр хамгаалал, аюулгүй ажиллагааны дүрэм, зааврыг мөрдөөгүйгээс халдлагад өртөх, гэмтэл бэртэл авах, осолд орох, амь насаа алдах зэрэг асуудлууд байгаа нь “Эрсдэлийн үнэлгээ”-ээр тогтоогдсон. Дээрх эрсдэлийг бууруулахад хувь нэмэр оруулах үүднээс энэхүү үйл ажиллагааг зохион байгуулж байгаа юм.

Эх сурвалж: www.polit.mn