Б.ДОЛЖИНЖАВ

 АНУ-ын Чикаго хот орчимд амьдарч буй монголчуудын "Монгол Наадам-Чикаго 2022" үндэсний баяр наадмаа энэ сарын 10-ны өдөр өргөн дэлгэр ёслол төгөлдөр зохион байгууллаа.

Наадмын хүчит бөхийн барилдаанд 64 бөх уран мэхийг уралдуулан барилдсанаас Сэлэнгэ аймгийн Шаамар сумын харьяат, Самбо бөхийн ОУХМ, Ш.Энхжавхлан түрүүлж, Завхан аймгийн Алдархаан сумын уугуул, сумын заан, чөлөөт бөхийн ОУХМ Б.Анхбаяр үзүүрлэж, Увс аймгийн Түргэн сумын харьяат, Улсын начин А.Эрхэмбаяр, Сэлэнгэ аймгийн Баянгол сумын харьяат, чөлөөт бөхийн ОУХМ, залуу бөх Х.Ундрахбаяр нар шөвгөрчээ.

Харин шагайн харваанд 30 орчим харваач цэц мэргэнээ сорьсноос Монгол үндэсний шагайн харвааны багийн харваанд

Тэргүүн байрт Аймгийн мэргэн С.Чинзориг ахлагчтай "Хасаа" баг,

Дэд байранд Аймгийн мэргэн Ц.Цогтбаатар ахлагчтай "Чандмань" баг,

Гутгаар байрт Аймгийн мэргэн Н.Тогтуун ахлагчтай "Сүлд"багууд шалгарч наадамчин олноо баясгалаа.

Шагайн хувийн цуваа харваанд Тэргүүн байрт Аймгийн дэд мэргэн Батцэнгэл,

Дэд байрт Аймгийн мэргэн Цэрэнтогтох,

Гутгаар байранд Аймгийн гоц мэргэн Эрдэнэбат нар шалгарлаа.

Мөн Үндэсний сурын харвааг энэ жил анх удаа зохион байгууллаа. Эрэгтэйчүүдээс сурын харваанд Н.Батбагана түрүүлж, хоёрдугаар байранд АНУ-ын иргэн Флойд, гутгаар байранд 3.Баттулга шалгарлаа.

Эмэгтэйчүүдийн харваанд тэргүүн байранд Я.Оюун шалгарчээ.

Баяр наадмын хүрээнд "Дээлтэй Монгол" арга хэмжээ болж, наадамчин олныг хамруулж, үндэсний дээл, хувцсаа ёслол төгөлдөр өмссөн иргэд болон холоос зорьж ирсэн Буриад зон олноос өргөмжлөн шалгарууллаа. Монгол хувцастай шилдэг гэр бүлээр Ч.Нармандахын гэр бүл шалгарч, шилдэг хосоор Б.Ганпүрэвийн гэр, шилдэг загварын хувцас н.Туяагэрэл, Т.Буянтогтох охин Б.Мандуухай нарын хамтаар шалгарлаа.

Чикаго хотод анх удаа зохиосон "НААДАМ” хөгжмийн фестивальд Монголоос “Айзам” хамтлаг, Сан-Франциско хотоос Цадиг хамтлаг, Чикаго хотод ажиллаж амьдарч буй BX, Мэх захгүй, Child of Vision гэх мэт хоёр улсын уран бүтээлчид оролцсон байна.

 Эх сурвалж:www.polit.mn