Б.ДОЛЖИНЖАВ

Японы Ерөнхий сайд асан, тус улсын түүхэн дэх чадварлаг удирдагчдын нэг Шинзо Абэ өнөөдөр буудуулж, зүрх нь зогссон хэмээн “Киодо” агентлаг мэдээлэв. Тодруулбал, Абэ Нара хотын гудамжинд үг хэлж байх үеэрээ цээжин хэсэгтээ буудуулжээ. Тэрбээр их хэмжээний цус алдсан учир эмнэлэгт яаралтай хүргэсэн байна. Түүний биеийн байдал маш хүнд байгааг одоогийн ерөнхий сайд Фүмио Кишида мэдээлэв. Мөн Абэг эмнэлгийн нисдэг тэргээр Нарагийн анагаах ухааны сургууль руу хүргэсэн гэж “NHK” мэдээллээ.

Шинзо Абэ ням гарагт болох дээд танхимын сонгуулийн сурталчилгаагаа хийн иргэдтэй уулзаж байх үеэрээ ийн халдлагад өртлөө. Түүнийг хоёр удаа буудсан гэмт хэрэгтэнг цагдаа нар баривчилж, бууг нь хураасан байна.

Энэ этгээд нь 41 настай Нара хотын оршин суугч Тэцүяа Ямагами хэмээх хүн гэж “NHK” телевиз мэдээллийн хөтөлбөрийнхөө үеэр мэдээлэв. Тэцүяа Ямагами нь Өөрийгөө хамгаалах хүчин буюу дэлхийн II дайны дараах Японы армийн офицер байжээ. Тэрбээр ерөнхий сайдад гомдолтой байсан учир санаатайгаар алсан гэдгээ хүлээн зөвшөөрсөн байна.

Японы Гал түймэр, гамшгийн удирдлагын агентлагаас мэдээлснээр Абэгийн хүзүүний баруун хэсэг болоод цээжний зүүн хэсэг нь буунд өртөж цээжнээсээ их хэмжээний цус алджээ.

Ерөнхий сайд Фүмио Кишида хэвлэлийнхэнд хандан “Шинзо Абэгийн амийг аврахын төлөө эмч нар чадах бүхнээ хийнэ. Ардчиллын үндэс болсон сонгуулийн сурталчигааны үеэр ийм хэрэг гарсан нь үнэхээр жигшүүртэй, зэрлэг үйлдэл юм. Ийм зүйлийг уучилж болохгүй” гэж ярьжээ. Тэрбээр бусад сайд нараа  Токиод цуглахыг шаардаж өнөө орой кабинетаа хуралдуулахаар болжээ.

Абэг буудуулах үеэр тэнд байсан ахлах сургуулийн хоёр сурагч “NHK”-д ярьжээ. Тэд “Бидний ард зогсож байсан ах гэнэт гарч ирээд Абэг хоёр удаа буудсан. Эхний буудалт нь тоглоомон буу шиг сонсогдсон. Нэг буудчихаад ухраад дахиад буудсан. Энэ үеэр их хэмжээний цагаан утаа гарсан” гэж ярьжээ.

Шинзо Абэ эрүүл мэндийн шалтгаанаар огцорч буйгаа 2020 оны наймдугаар сард зарласан. Түүний албан тушаалыг Засгийн газрын нарийн бичгийн дарга байсан Сүга Ёшихидэ өвлөсөн юм. Харин одоо Фүмио Кишида ерөнхий сайдаар ажиллаж байна.

Эх сурвалж:Kyodo