Б.ДАРЬСҮРЭН

Монгол түмэн цар тахлын улмаас хоёр жил наадаагүй. Өнөө жил COVID-19-ийн тархалт буурсан тул Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн тэгш ойг тэмдэглэхээр болсон.

Төв цэнгэлдэх хүрээлэн, Хүй долоон худгийн ойр орчмыг тохижуулах зэргээр цөөнгүй ажлыг Нийслэлийн Засаг даргын тамгын газар, Баяр наадмыг зохион байгуулах комиссоос хийгээд буй. Жил бүр Сүхбаатарын талбайд уламжлал болгон зохион байгуулдаг “Улаанбаатарын үдэш” цэнгүүнийг энэ жил анх удаа “Хүй долоон худаг”-т явуулах юм. Үүнтэй холбоотойгоор гэмт хэргийн гаралт болон цагдаагийн байгууллагаас авах арга хэмжээ бэлэн эсэх нь асуудалтай байгаа юм.

Энэ талаар Нийслэлийн Цагдаагийн удирдах газрын Хэвлэл мэдээллийн төвийн дарга Б.Баатархүүгээс тодрууллаа. Тэрбээр “Цагдаа, дотоодын цэргийн бие бүрэлдэхүүн “Бэлэн байдлын I зэрэг”-т шилжин ажиллана. Өмнө нь тухайн байршилд үйл ажиллагаа зохиогдоход гэмт хэргийн гаралт өмнөх жилүүдээс багассан. Халаасны хулгай болон хүүхэд төөрөх зөрчлүүд түлхүү гарч байсан. Үйл ажиллагааны цэгүүдээс гадна иргэдийн олноор цуглардаг голын эрэг, хотын ногоон бүсүүдэд хяналт тавьж ажиллана” гэдгийг хэллээ.

Эх сурвалж: www.polit.mn