Б.ДАРЬСҮРЭН

Наадамд уралдах хурдан морь, унаач хүүхдийн бүртгэл энэ сарын 7-ны 09:00 цагт эхэлж, 9-ний 22:00 цагт дуусна хэмээн Хурдан морины салбар хорооноос мэдээллээ.

"Үндэсний их баяр наадмын тухай хууль"-ийн шинэчилсэн найруулгын 10 дугаар зүйлийн 10.12 дугаарт заасны дагуу дараах баримт бичгийг үндэслэн бүртгэж, дугаар олгоно гэлээ.

1. Хурдан морь унахыг зөвшөөрсөн тухай унаач хүүхэд, түүний эцэг, эх, асран хамгаалагчийн тодорхойлолт;
2. Унаач хүүхдийн төрсний гэрчилгээ болон хүүхдийг ослын даатгалд даатгуулсан тухай бичиг баримт;
3. Уралдах морины нас, угшлын талаарх үнэн зөв тодорхойлолт

Бичиг баримтыг бүрдүүлээгүй буюу унаач хүүхдийн аюулгүй байдлыг бүрэн хангаагүй тохиолдолд тухайн уяачийн морийг уралдаанд оролцуулахгүй. Мөн бүртгэх цагаас хоцорсон хүүхэд, уралдах морийг бүртгэхгүйг мэдэгдлээ.

Наадамд уралдах морь тус бүрийг насны ангиллаар уралдах өдрийн өглөө Стандарт, хэмжил зүйн газраар баталгаажуулсан автомат төхөөрөмжөөр хэмжих юм.

Бүртгүүлэхдээ уралдах морьдыг авч ирэх шаардлагагүй гэв.   

Улсын баяр наадмын хурдан морьдын уралдаан энэ сарын 10-ны 07:00 цагаас хязаалан насныхаар эхлэх юм.

Эх сурвалж: www.polit.mn