Б.ОД

Их, дээд сургуулийн элсэлтийн зохион байгуулалтын талаар өнөөдөр мэдээлэл өглөө.

Элсэлтийн ерөнхий шалгалт дууссантай холбоотойгоор өнөөдрөөс их, дээд сургуулиудын элсэлтийн үйл ажиллагааг зохион байгуулах ажил эхэллээ. Тухайлбал, ур чадвар шаардсан хичээлүүдийн шалгалтыг өнөөдрөөс пүрэв гараг хүртэл зохион байгуулахаар ажиллаж байгаа юм.

Энэ талаар БШУЯ-ны Дээд болон мэргэжлийн боловсролын удирдлага, зохицуулалтын газрын дарга Х.Тамир “Ур чадварын шалгалт дууссаны дараа элсэлтийн үйл ажиллагааг зохион байгуулах ёстой. Учир нь дүн гараагүй байхад хураамж төлж ур чадварын шалгалтаа өгөхдөө эргээд ЭЕШ дүн нь оноо нь хүрээгүй бол ур чадварын шалгалтын дүн нь хүчингүй болох эрсдэлтэй. Тиймээс ийм дарааллыг тогтоож, тодорхой чиглэлүүдийг их, дээд сургуулиудад өгсөн. Нийт 88 их, дээд сургуулиар элсэлтийг зохион байгуулж байгаа. Элсэлтийн эцсийн үр дүн долдугаар сарын 8-ны өдрөөр дуусгавар болохоор тодорхой чиглэл өгсөн.Мөн БШУЯ-наас орон нутгаас элсүүлэх үйл ажиллагааг онлайнаар зохион байгуулна гэсэн чиглэлийг өгөөд буй. Харин их сургуулиуд сурталчилгааныхаа үйл ажиллагааг зохион байгуулах нь заавал онлайнаар байх албагүй.Томоохон буюу МУИС, ШУТИС, АШУҮИС зэрэг их сургуулиудын хувьд элсэлтийн үйл ажиллагааг онлайнаар өөрсдөө бие даан зохион байгуулах ажлыг эхлүүлээд байгаа.Бид элсэлтийн ажиллагааг онлайнаар бүртгэж, хуваарь сонголтын ажлыг онлайнаар хийж байна. Өмнө нь аймгийн төв дээр хуваарь дуудахаар олон хоног хүүхдүүдийг хүлээлгэж, чирэгдэл учруулдаг байсныг цар тахлын үед өөрчилж онлайн зохион байгуулалтад орсныг үргэлжлүүлнэ гэдгийг хэлье" гэв.

Эх сурвалж:www.polit.mn