Б.ОД

Нийгмийн даатгалын шимтгэлийн/НДШ/ буцаан олголтын тухай Нийгмийн даатгалын ерөнхий газраас/НДЕГ/ мэдээлэл өглөө.

Энэ оны тавдугаар сард нэг сая ба түүнээс доош төгрөгийн цалин болон түүнтэй адил орлогоос НДШ-ээ төлсөн иргэний 50 хувийн буцаан олголтын мөнгийг зургаадугаар сарын 25-н буюу маргаашаас эхлэн дансанд нь шилжүүлнэ.

Хувиараа нийгмийн даатгалын шимтгэлээ төлсөн иргэд мөн буцаан олголтоо авах юм. Харин газрын тос болон уул уурхайн салбарт ажилладаг иргэдэд хамаарахгүй аж.

2022 оны тавдугаар сараас 12 дугаар сард төлсөн шимтгэлийн 50 хувийг сар бүрээр нь бодож олгоно. Ингэхдээ тухайн шимтгэл төлсөн сарын буцаан олголтыг дараа сард данс руу нь шилжүүлэх юм.

Салбарын сайдын өгсөн мэдээллээр Монгол Улсад 400 мянга орчим иргэн нэг сая ба түүнээс доош төгрөгийн цалин хөлс, орлоготой гэсэн тооцоо гарчээ. Эдгээрээс 80 мянга нь сайн дураараа НДШ төлдөг бол үлдсэн 320 мянган иргэн ААН, байгууллагад албан журмын даатгалаа төлдөг байна.

Энэ оны тавдугаар сард нийгмийн даатгалын шимтгэлийн орлого 983 тэрбумд хүрчээ.