Б.ОД

УИХ-ын чуулганы пүрэв гарагийн хуралдаан эхэллээ. 

Монгол Улсын Ерөнхийлөгчийн өргөн мэдүүлсэн "Хүнсний хангамж, аюулгүй байдлыг хангах талаар авах зарим арга хэмжээний тухай" УИХ-ын тогтоолын төслийн анхны хэлэлцүүлгийг хийж байна. 

Энэ үеэр УИХ-ын гишүүн Б.Пүрэвдорж “Сая дэгдсэн махны үйлдвэртэй холбоотой асуудал бол монгол махны бизнесийг унагаах гэсэн санаатай үйлдэл гэж харж байгаа. Өнгөрсөн онд бэлтгэсэн 6000 тн дулааны аргаар боловсруулсан мах, 4000 тн адууны мах байгаа.  Тухайн өвөл зуд болсон учир туранхай малын мах ийшээ орчихсон. Дулааны аргаар боловсруулсан махны бүх өөхийг нь аваад, буцалгаад авчихсан учраас шим шүүс нь гарчихсан, 25 мянган төгрөгийн өртөгтэй. Ийм махыг зах зээл рүү оруулна гэж байхгүй. Шинэ мах гарчихсан байхад ийм мах авдаг гуанз ч байхгүй. Мөн халуун зунаар адууны мах иддэг хүн байхгүй. Ингэхээр махны үйлдвэрүүд 100 гаруй сая ам долларын асуудалд орж байна. Үүнийг экспортод гаргахгүй бол махны үйлдвэрүүд намрын махны бэлтгэл хийж чадахгүйд хүрнэ. Тиймээс дээрх махыг экспортод гаргахыг хориглосон шийдвэрээ Засгийн газар эргэж харах ёстой” гэв.