Б.ОД

Улсын бүртгэлийн ерөнхий газар (УБЕГ)-аас "Иргэний шилжилт хөдөлгөөн"-ий бүртгэлийг цахимаар бүртгэх үйлчилгээг өнөөдрөөс (2022.06.16) E-Mongolia нэгдсэн системд нэвтрүүллээ. Манай улсад жилд 210-250 мянга орчим хүн шилжилт хөдөлгөөн хийдэг гэсэн статистик бий.

Энэ талаар УБЕГ-ын дарга Д.Дэлгэрсайхан "Сүүлийн жилүүдэд бид үйлчилгээгээ цахимжуулах ажлыг эрчимтэй хийж байгаа. Тиймээс улсын бүртгэлийн цахим үйлчилгээг өргөтгөх, цахим үндэстэн болох үйл ажиллагааны хүрээнд E-Монголиа системд олон үйлчилгээгээ оруулсан. Тодруулбал, УБЕГ-ын 22 төрлийн лавлагаа, 55 төрлийн үйлчилгээ ороод байна. Үүнтэй холбоотойгоор 2022 оны эхний улирлын байдлаар иргэдээс шууд гарч байгаа зардал 30 тэрбум төгрөгөөр хэмнэгдсэн тооцоолол гарч байгаа.Өмнө нь шилжилт хөдөлгөөн хийхэд шаардлагагүй маш олон баримтыг хувь иргэнээс нэхдэг байсан. Улмаар Иргэний улсын бүртгэлийн тухай хууль 2018 онд шинэчлэгдэн батлагдсанаар нэхэж байгаа бичиг баримтын тоог хоёр дахин багасгасан үзүүлэлттэй байгаа юм. Иргэний шилжих бүртгэлийг цахимаар бүртгэснээр оршин сууж байгаа хаягийн баталгааг бүртгэлийн ажилтнууд цахим системээс шалгах бололцоогоор хангаж байна. Мөн иргэд ямар нэгэн зардал чирэгдэлгүй үйлчилгээг авах бололцоотой" гэв.