Б.ДАРЬСҮРЭН

Зам, тээврийн хөгжлийн сайд Л.Халтар “Хүйтний хөндий-Арвайхээр” чиглэлийн их засвар хийгдэж буй  57.56 км авто замд ажиллалаа. Баруун аймгууд руу чиглэсэн тээврийн хэрэгслийн зорчих урсгал ихтэй тус замыг Азийн хөгжлийн банкны зээлийн хөрөнгөөр “Эйч Кэй Би Интернэйшнл Холдинг” ХХК  гүйцэтгэж байгаа аж. Одоогийн байдлаар гүйцэтгэл 13 орчим хувийн хоцрогдолтой байна.

Салбарын сайд Л.Халтар “өмнөх жилийн хучилт дээр гүйцэтгэгч компани зарим хэсэгт алдаа гаргасан байна. Тус компанийн гэрээ 2023 оны дөрөвдүгээр сард дуусах хэдий ч энэ оны есдүгээр сарын дунд үе гэхэд зорчих хэсгийн хөдөлгөөн нээх чиглэл өгч, орон нутгийн удирдлагаас бүх талаар дэмжиж ажиллахыг хүслээ. Уг зам нь гурван жилийн баталгаат засварын хугацаатай. Энэ хугацаанд ямар нэгэн эвдрэл гарвал гүйцэтгэгч өөрсдийн зардлаар засна.  “Эйч Кэй Би Интернэйшнл Холдинг” компани нь орон нутаг болон худалдан авах ажиллагааны газраас зарлаж байгаа тендерүүдэд оролцож одоогийн байдлаар таван газарт ажил авсан байна. Ингэхээр ажиллах хүн хүч, техник дутагдаж буй нь ажил удаашрах шалтгаан болж байна” гэдгийг хэллээ.

Цаашид гүйцэтгэгч болон зөвлөх компани, төслийн нэгж ажлын уялдаа холбоогоо сайжруулах, өмнөх жилийн чанаргүй хийгдсэн 6.8 орчим км авто замыг гүйцэтгэгч байгууллага өөрсдийн зардлаар дахин гурван см-ийн хучилт хийх, яам болон бусад холбогдох байгууллагууд хамтран хөдөлмөрийн аюулгүй байдлын чиглэлээр үзлэг хийж зөвлөмж өгөх, төлөвлөгөөнөөс 3.5 дахин бага техниктэй, 60 гаруй хүний нөөц дутуу байгааг яаралтай шийдвэрлэж, ажиллах хүчээ нэмэгдүүлэх чиглэлд анхаарч ажиллахыг салбарын сайд үүрэгдлээ.

Эх сурвалж: www.polit.mn