Б.ОД

Зуны эхэн сарын шинийн 15 буюу Бурхан багшийн их дүйчин өдөр өнөөдөр тохиож байна.

Бурхан багшийн их дүйчин өдрийг Азийн бурхны шашинтай орнууд 2000 жилийн  өмнөөс тэмдэглэж эхэлсэн. Анх 1999 онд НҮБ-ын Ерөнхий ассамблейгаас Бурхан багшийн Их дүйчин өдрийг олон улсын хэмжээнд тэмдэглэн өнгөрүүлж байхаар шийдвэрлэсэн байдаг.

Манай улс Бурхан багшийн Их дүйчин өдрийг нийтээр тэмдэглэх баярын өдөр болгон бүх нийтээр амрахаар болсон.  Шинийн 15-ны энэ өдөр буян үйлдвээс сая дахин аривжина. Мөн найман их аюулаас гэтлэх бөгөөд нэрвэлт үгүй тамд үл унана.

Бурхан багшийн их дүйчин өдөр гурван том тэмдэглэлт явдал давхацдаг байна. Тодруулбал, Бурхан багш эхийн хэвлийд оршсон, номоо номлож хутгийг олсон, нирваан дүрийг үзүүлсэн гэх гурван том цаг хугацаа нэг өдөр давхацдаг учраас Их дүйчин хэмээн нэрлэдэг.

Энэ өдөр буян хурааж, сайн үйл хийхэд буян арвиждаг гэж үздэг учраас хүн бүр сэтгэлээ ариун байлгаж, буян хураах үйлд оролцдог байна.

Энэ өдөр 10 хар нүгэл үйлдэхийг цээрлэх хэрэгтэй гэж номложээ. Тодруулбал, амьтны амь таслах, хулгай хийх, бэлгийн дур хүслээ ёс бусаар хангах, худал ярих, хов өгүүлэх, ширүүн үг өгүүлэх, дэмий чалчах, хүсэл шунал, хорон сэтгэл, буруу үзэл зэрэг нь 10 хар нүгэлд багтдаг.

Эх сурвалж:www.polit.mn