Б.НЯМСҮРЭН

Баянхонгор аймгийн иргэн Б.Мөнх-Эрдэнэ, Б.Мөнхтогоо нар эмнэлгийн буруутай үйл ажиллагаанаас болж олгойн хагалгаа хийлгэсэн хүүхэд маш хүнд байдалтай гурван жил болж байгаа тухай мэдээлэл хийлээ.

Иргэн Мөнхтогоогийн хүү Эрхэмбаяр нь 2019 онд Галуут сумаас ирж Баянхонгор аймгийн Нэгдсэн эмнэлэгийн мэс заслын тасагт олгойн хагалгаанд орсон байна. улмаар 24 цагийн дараа ухаан ороогүй байдалтай байжээ. Эмч нар нугаснаас нь хоёр өдөр дараалан ус авчээ. Сүрьеэ, менингеттэй байна гэсэн хариу хэлсэн байна. Улаанбаатар хотод эх нялхаст үзүүлэн, эмчлүүлсэнээр олгойн хагалгаанд орсноос 19 хоногийн дараа ухаан оржээ. Гурван жилийн хугацаанд тасралтгүй эмчилгээ хийлгэсэн боловч бие нь сайжраагүй, асаргааны хүн болсон байна. Одоогоор монголд эмчлэгдэх боломжгүй байгаа аж.

Б.Мөнхэрдэнэ: “ Хүүхдийн мэдээгүйжүүлэлтийн эмчилгээнээс үүдэн ийм сөрөг дагавар үүссэн гэдгийг олон эмч дүгнэсэн. 12 наснаас доош насны хүүхдэд ерөнхий унтуулга хийнэ гэдэг зөвлөмжтэй байхад аймгийн унтуулгын эмч П.Алтанзаяа хүүхдэд нугасаар мэдээ алдуулалт хийсэн байдаг. Мөн давхар унтуулга хийсэн учраас тархи нь маш хүнд өвдөх шалтгаан болсон. Хүүхдийн биеийн байдал ийм болсонд гомдолтой байна. Аймгийн цагдаа, прокурорт өргөдөл гомдол гаргасан ч эмнэлэг, эмч нарт арга хэмжээ аваагүй. Хариуцлагагүй эмнэлгийн эмч ажилчид ажлаа хийсээр л байна” гэлээ.

Б.Мөнхтогоо: “Миний хүү эрүүл хүүхэд байсан. Хагалгаанд орсноор ийм байдалд хүрлээ. Үйлдлээ нуух зорилготойгоор өөр өвчин болгож сүрьеэгийнхээ тасаг руу явуулахаар шийдсэн байгаа юм.  Хүүхдийн биеийн байдал маш хүнд нуруу нугас дөрвөн мөч нь байнгын таталттай байдаг. Зөвхөн шингэн зүйлээр хооллодог. Толгойгоо даах чадваргүй, нойр муутай, үргэлж нойрны эм, өвчин намдаах эм уудаг. Хоёр хүн байнга асардаг. Ээж нь байнга өргөж тэвэрч асарсаар нурууны суулт өвчтэй болсон. Ах нь гэр орны ажил, хүүхэд асрах ажилд туслахаар сургуулаас гарсан. Өвчиндөө шаналж буй хүүгээ хараад элэг эмтэрч байна. Эмч нарын хариуцлагагүй, чадваргүй байдлаас болж ийм байдалд хүрлээ. Цагдаа шүүх хариуцсан байгууллага нь арга хэмжээ аваагүй. Өнгөрсөн тавдугаар сарын 10-нд хөөн хэлэлцэх хугацаа дууссан. Гурван жилийн хугацаанд бүх эмчилгээний төлбөрийг бид өөрсдөө хариуцсан. Эмчилгээний мөнгө 2022 оны хоёрдугаар сарын байдлаар 25 сая 500 мянга болсон” гэлээ.

Эх сурвалж: www.polit.mn